Jemqorlyqqa qarsy is-qımyl jónindegi ulttyq bıýro tarapynan Qazaqstan Respýblıkasynyń Belarýs Respýblıkasyndaǵy elshiliginiń aǵa býhgalteri A.Seıdýálıev ustaldy, dep habarlady Jemqorlyqqa qarsy is-qımyl jónindegi ulttyq bıýronyń baspasóz qyzmeti.
A.Seıdýálıevtiń 2012 jyl men 2015 jyl aralyǵynda jalǵan kassalyq shyǵys orderlerin toltyrý arqyly 207 000 AQSh dollary bolatyn bıýdjettik qarjyny jymqyrǵany anyqtalyp otyr. Budan bólek, atalǵan kezeń aralyǵynda A.Seıdýálıev elshiliktiń atyna Belarýs Respýblıkasynyń salyq organdarynan qosymsha qun salyǵy retinde qaıtarylǵan 474 883 AQSh dollaryn qaltasyna basqan. Sóıtip, urlanǵan qarjynyń jalpy kólemi 681 883 dollardy quraǵan.
Qazirgi kezde A.Seıdýálıev Qazaqstan Respýblıkasy Qylmystyq-prosessýaldyq kodeksiniń 128-babyna sáıkes Astana qalasyndaǵy Ishki ister departamentiniń ýaqytsha ustaý oqshaýlaǵyshyna qamaldy.
Sotqa deıingi tergep-tekserý úderisteri jalǵasýda.
* * *
Astana qalasy boıynsha Jemqorlyqqa qarsy is-qımyl jónindegi ulttyq bıýro departamenti tarapynan Astana qalasyndaǵy Saryarqa aýdany ákiminiń orynbasary R.Akchýrın ustaldy, dep habarlady osy vedomstvonyń baspasóz qyzmeti.
R.Akchýrınniń Astana qalasy ákimdigine qarasty «Astana Tazalyq» JShS-niń bas dırektory A.Basqanbaevpen qylmystyq ýaǵdalastyqqa bara otyryp, «SBS-Snab Servıs» JShS men «Install Servis Com» JShS-in qurǵany jáne 2016 jyly kósheni mehanıkalandyrylǵan sanıtarlyq tazalaý úshin memlekettik satyp alý konkýrsy arqyly jalpy somasy 1,8 mlrd teńgeniń utysyn zańsyz qamtamasyz etkeni anyqtalyp otyr. Sóıtip, zańsyz tabysqa kenelgen.
Buǵan qosa, R.Akchýrın óziniń baqylaýyndaǵy kompanııalardyń múddesi úshin ákimdiktegi laýazymdy adamdarǵa birneshe márte para bergen.
Qazirgi kezde R.Akchýrın Qazaqstan Respýblıkasy Qylmystyq-prosessýaldyq kodeksiniń 128-babyna sáıkes Astana qalasyndaǵy Ishki ister departamentiniń ýaqytsha ustaý oqshaýlaǵyshyna qamaldy.
Sotqa deıingi tergep-tekserý úderisteri jalǵasýda.