Premer-mınıstr Oljas Bektenov «Atameken» ulttyq kásipkerler palatasynyń alańynda munaı-gaz, energetıka, taý-ken metallýrgııasy, agroónerkásip salalarynyń ókilderi, qaýymdastyq músheleri men óńir sarapshylary qatysqan keńes ótkizdi. Kezdesýde kásipkerlikti damytý, salyq reformalary, bıznesti qoldaý tetikteri, aqparattyq júıelerdi sıfrlandyrý sekildi ózekti máseleler qaraldy.
Keńeste Úkimet basshysy kásipkerlikti órkendetý Memleket basshysy aıqyndaǵan basty baǵyttardyń biri ekenin aıtyp, ekonomıkalyq ózgeristerde bıznes negizgi seriktes sanalatynyn jetkizdi. Bul úderiste «Atameken» palatasynyń orny aıryqsha ekeni de tilge tıek etildi.
Jıyndy ashqan Premer-mınıstr kásipkerlikti damytý Memleket basshysy aıqyndaǵan basym baǵyttardyń biri ekenin erekshe atap ótti. Bıznes – ekonomıkalyq reformalar júrgizýde basty seriktes, bul jumysta «Atameken» UKP mańyzdy ról atqarady.
«Jarty jyl boıy qoǵamda konstıtýsııalyq reformany belsendi talqylaý júrip jatyr. Ashyq dıskýssııalar boldy. Azamattardan myńdaǵan usynys kelip túsýde jáne olardyń barlyǵy tereń zerdelenip, eskerilip jatyr. Bul – elimizdegi demokratııalyq úderisterdiń aıqyn dáleli. Elimizdiń jańa Konstıtýsııasynyń jobasy halyqqa usynyldy, basty maqsat – egemendigimizdi, Táýelsizdikti nyǵaıtý. Barlyǵyńyzdy Prezıdentimizdi jáne jańa Konstıtýsııany qoldaýǵa shaqyramyn», degen Oljas Bektenov el azamattaryna Konstıtýsııa reformasyn durys jetkizý mańyzdy ekenin atap ótti.
Jańa Konstıtýsııa jobasynda zań men tártip ústemdik quratyn ádiletti qoǵam qurý baǵdaryna erekshe mán berilgen. Mundaı ustanym kásipkerlerge de zor jaýapkershilik júkteıdi. Adal eńbek, kásipke qurmet, elge janashyrlyq sııaqty qundylyqtar aldyńǵy qatarǵa shyǵady. Ádildik pen zańdylyq qaǵıdattaryn konstıtýsııalyq deńgeıde bekitý memleket pen bıznes arasynda senimge qurylǵan uzaqmerzimdi seriktestik ortany qalyptastyrýǵa jol ashady.
Keńes barysynda jańa salyq erejelerin kezeń-kezeńimen engizý jónindegi tapsyrmalardyń oryndalý barysy talqylandy. Qatysýshylar salyq tóleýshilerge arnalǵan ótpeli kezeńniń tetikterine, ákimshilendirýdiń qolaıly úlgilerine toqtaldy. Kásipkerlerdiń jańa talaptarǵa aýyrtpalyqsyz beıimdelýine birqatar sheshim qabyldanǵan. Úkimettiń qaýlysymen shaǵyn ári mıkrobıznes, jekelegen jaǵdaılardy qospaǵanda, bıylǵy 1 qańtarǵa deıin tekserýlerden, kameraldyq baqylaýdan, ákimshilik jaýapkershilikten bosatyldy. Bıyl 1 sáýirge deıin bereshek ótelgen jaǵdaıda ósimpuldar men aıyppuldardy esepten shyǵarý tártibi qoldanylady. Qyzmetti toqtatý ne jabý rásimderi de qaıta qaralǵan. Jyl aıaǵyna deıin shaǵyn jáne mıkrobızneske ótpeli kezeń engizildi, qateler úshin ósimpuldar men aıyppuldar alynbaıdy.
Premer-mınıstrdiń orynbasary – Ulttyq ekonomıka mınıstri Serik Jumanǵarın bir mezette 250 myńǵa deıin salyq tóleýshige qyzmet kórsete alatyn Jobalyq keńse jumysy týraly baıandady. Keńse «biryńǵaı tereze» qaǵıdatymen jumys istep, ótinishterdi jedel qaraýǵa múmkindik beredi. Keıingi úsh aptada suranystar aǵyny 19,5 myńnan 7,1 myńǵa deıin azaıǵany tehnıkalyq úderisterdiń turaqtanǵanyn ańǵartady. «Halyq býhgalteri» aksııasyna 17 myńnan asa salyq tóleýshi qatysqan. Salyq júıesinde tirkelgen azamattar men bıznes sanynyń óskeni baıqalady. Jyl basynan beri 41,2 myń adam qaıta esepke turǵan. О́zin-ózi jumyspen qamtyǵandarǵa arnalǵan jańa rejim buǵan deıin tirkelmegen 187,2 myńnan astam adamdy zańdy ortaǵa shyǵardy.
Bıznesti qarjylaı qoldaý sharalary da kúsheıip keledi. Byltyr qoldanystaǵy baǵdarlamalar aıasynda jalpy quny 365 mlrd teńgege jýyq 3,4 myń shaǵyn jáne orta bıznes jobasy sýbsıdııalanǵan. Bul naqty sektordyń belsendiligin arttyrýǵa baǵyttalǵan qadam retinde baǵalanady.
«Atameken» ulttyq kásipkerler palatasynyń tóralqa tóraǵasy Qanat Sharlapaev memleket pen bıznes arasyndaǵy ózara is-qımyldy nyǵaıtý jumysy týraly málimet berdi. Palata orta ári iri bıznes arasynan ishki ınvestorlardy damytýǵa basymdyq beredi. Keńeıtýge ne jańǵyrtýǵa daıyn kásiporyndardyń ınvestısııalyq jobalarynyń pýly jasaqtalyp jatyr. Palata basqarmasy tóraǵasynyń orynbasary Tımýr Jarkenov jańa Salyq kodeksine qatysty bıznes-qoǵamdastyqtyń ustanymyn jetkizip, arnaıy salyq rejimi men densaýlyq saqtaý sektoryna salyq salý tásilderin jetildirý jóninde usynystar aıtty.
Keńeste otandyq taýar óndirýshiler tizilimin iske qosý máselesi de qaraldy. О́nerkásip jáne qurylys mınıstri Ersaıyn Naǵaspaev júıede 5 608 kompanııa tirkelgenin, 13 533 ótinim berilgenin habarlady. Palata basqarmasy tóraǵasynyń orynbasary Nursultan Shoqanov jańa sıfrlyq júıege úzdiksiz kóshýge buryn berilgen ındýstrııalyq sertıfıkattardyń 1 924 ıesi avtomatty túrde tizilimge engizilgenin aıtty. Kún saıyn bul bazaǵa júzge jýyq óndirýshi qosylady.
Bıznes ókilderi atynan «Almaty boıaýlary» seriktestiginiń dırektory Rımma Salyqova men «Qazelektromash» seriktestiginiń dırektory Vıtalıı Raspopın usynystary men suraqtaryn jetkizdi. Olar shaǵyn jáne orta bıznespen ózara is-qımyl, memlekettik satyp alý tájirıbesi, salalyq talaptardy eskere otyryp, salyqtyq ákimshilendirýdiń jekelegen tustaryn jetildirý qajettigin kóterdi. Kásiporyndardy óndiristik sıkl deńgeıi men aýqymyna qaraı sanattarǵa bólý, memlekettik qoldaý sharalaryn lokalızasııa men ınvestısııa kólemine táýeldi etý, tizilimdegi ónimderdi sıfrlyq baqylaýdy naqtylaý jaıy da qozǵaldy.
Premer-mınıstr aıtylǵan bastamalarǵa qatysty pikir bildirip, memlekettik organdarǵa «Atameken» palatasymen birlesip, usynystardy jan-jaqty pysyqtaýdy tapsyrdy. Qabyldanatyn sheshimder turaqty ósimdi qamtamasyz etýge, naqty sektordy nyǵaıtýǵa, eksporttyq áleýetti keńeıtýge, jańa jumys oryndaryn ashýǵa qyzmet etýge tıis ekeni basa aıtyldy. Munyń bári memleket pen bıznes arasyndaǵy senimdi kúsheıtip, uzaqmerzimdi seriktestikti ornyqtyrýǵa baǵyttalǵan.