Qyzylordańyzdy jeltoqsanda ǵana azdap aıaz qysqan. Qar jıi jaýǵanymen, aıtarlyqtaı sýyǵy bolmady. Sońǵy birneshe kúnde aýa-raıy jylynyp, jer erip, jańbyr sirkirep tur. Muny nege aıtyp otyrmyz?
4 qańtar kúni tótenshe jaǵdaılar qyzmetiniń dıspetcherlik bólimine Qyzylorda oblysy, Shıeli aýdany, Báıgequm eldi mekeniniń tusyndaǵy Qanqoja kóline muz astyna óziniń avtokóligi túsip ketkendigi jóninde sol aýyldyń turǵyny habarlaǵan.
Jaǵdaı bylaı bolypty. Báıgequm aýylynyń turǵyny dosynyń joǵalǵan malyn izdeýge barady. Kóldiń arǵy betin kókteı sholyp ótpek nıetpen «OPEL Vectra» markaly avtokóligin muzdyń ústine salyp kep jiberedi. Sodan muzdyń ústinde kele jatyp, kólik sýǵa batyp ketken. Alaıda, ózderi aman-esen shyǵyp, avtokólik muz astynda qalǵan.
Qutqarýshylar súńgýir jabdyqtaryn paıdalanyp, bar kúshterin jumsap, kólikti jaǵaǵa shyǵaryp berdi.
Áıteýir, oqıǵa adam shyǵyny bolmaı aıaqtaldy. Muz jarylyp, kólik kúmp etip kólge túskende, mashınanyń esigi ashylmaı qalsa, orny tolmas ókinish bolar edi. Sondyqtan, «saqtansań – saqtaıdy» degen qaǵıdany qatań ustamasa bolmaıdy.
Erjan BAITILES,
«Egemen Qazaqstan»
Qyzylorda oblysy