Álemdik deńgeıdegi dúbirli doda jaqyndaǵan saıyn aqmolalyq sportshylardyń da júrek dúrsili jıileı bastaǵandaı. Áıtkenmen, oblystyq sport basqarmasy basshysynyń orynbasary Áset Búkibaevty jolyqtyrǵanymyzda, júzinen janǵa jaıly jylylyq baıqadyq. Sóziniń nyqtylyǵynan bolsa kerek, asa alańdarlyq jaǵdaıdy kórip turǵanymyz joq.
– О́zderińiz bilesizder, alaman báıgege eń myqtylar joldama aldy, – deıdi ol. – Joldamanyń salmaǵy óte aýyr. Oblystyq, respýblıkalyq, halyqaralyq dárejedegi kóptegen jarystarǵa qatystyq. Ýnıversıada aldyndaǵy testik dodalar aıryqsha tartysty ótti. Bul – óz Táýelsizdiginiń 25 jyldyǵyn tolaıym tabystarmen atap ótken Qazaqstannyń TMD aýmaǵynda tuńǵysh ret ótkizilgeli otyrǵan Ýnıversıadasy. Namys pen jigerdi qaırar baıraqty básekege oblysymyzdyń 17 sportshysy qatysatyny úlken qýanysh. Biz olarǵa tek qana tabys tileımiz.
Aqmola jurtshylyǵy Ýnıversıada qurmetindegi sporttyq, mádenı-kópshilik sharalardy jyl boıy jalǵastyrdy. Qazir eń úlken oqıǵa – Ýnıversıada alaýyn óńirlerde alǵash tutatýǵa arnalǵan saltanatqa daıyndyq qyzý júrip jatyr. Uıymdastyrý alqasy bekitken kestege saı Aqmola oblysynda Ýnıversıada alaýyn jaǵý estafetasy 26 qańtarda ótkiziledi. Al Almatydaǵy Dúnıejúzilik Ýnıversıadanyń ashylý saltanatynda oblys atynan kishi olımpıada ala-ýyn alyp shyǵý qurmeti Kókshetaýdaǵy A.Myrzahmetov atyndaǵy ýnıversıtettiń stýdenti, bokstan álem chempıony Dına Jolamanǵa berilip otyr.
Jalpy, aqmolalyq sportshylardan Ýnıversıada baǵdarlamasyndaǵy shańǵy jarysyna Olga Mandrık, Oljas Klımın, Konstantın Borsov, Valentına Ebel jáne Valerııa Tıýlenova qatysady dep kútilýde. Bıatlonnan elimizdiń namysyn Anna Kıstanova, Alına Raıkova, Tımýr Hamıtgatın, Anastasııa Kondrateva jáne Roman Eremın qorǵaıdy. Osy oraıda, Alena Raıkovanyń 2015 jylǵy Ýnıversıada kezinde 15 shaqyrymdyq qashyqtyqta jeke básekede aldyna jan salmaǵanyn atap ótkimiz keledi. Álem kýbogynyń kezeńdik jarystarynda da táýir kórsetkishterge jetip júr. Sondaı-aq, atalǵan Ýnıversıadada Qazaqstannyń aralas estafetashylar quramynda bolyp, júldeli ekinshi orynnan kóringen Anna Kıstanovanyń da alǵy shepten kórinetininen úmittimiz.
Shaıbaly hokkeıden aqmolalyq alty sportshy synǵa túspek. Atap aıtsaq, Konstantın Savenkov, Anton Petrov, Pavel Akolzın, Anton Býrdelev, Vıktor Ivashın, Aleksandr Kaznacheev quramadaǵy beldi oıynshylar qatarynda. Sondaı-aq, Anastasııa Sýrgaı kerlıng sporty boıynsha baq talastyrady. Aqmolalyq bapkerlerdiń boljamyna qaraǵanda, jerlesterimizdiń Ýnıversıadada top jaryp, júldeger atanýyna tolyq múmkindikteri bar.
Baqbergen AMALBEK,
«Egemen Qazaqstan»