«Atameken» ulttyq kásipkerlik palatasynyń reıtıngi boıynsha Ulytaý oblysy shaǵyn bıznes pen orta kásipkerlikpen aınalysýǵa qolaıly úsh óńirdiń qataryna kirdi. Ulytaýlyq 195 jas kásipkerge qaıtarymsyz grant qarajaty berildi.
Qaıtarymsyz grant kólemi bıznes jobanyń atqaratyn qyzmetine qaraı 1 mln teńgeden – 7 mln teńge aralyǵyn quraıdy. Qarjy jastardyń bıznes bastamalaryn yntalandyryp, jańa kásip ashýǵa nemese jumys istep turǵan kásipti keńeıtýge baǵyttalady. Byltyr bólingen qarjynyń jalpy kólemi 300 mln teńge boldy.
Jaqynda Ulytaý oblysy ákiminiń orynbasary Nurtas Káripbaevtyń qatysýymen ótken keńeste kásipkerlikti, sonyń ishinde jas bıznes ıelerin qoldaý sharalary talqylanyp, ınvestısııalyq jobalardy iske asyrý máseleleri sóz boldy.
N.Káripbaevtyń aıtýynsha, oblysta memleket qoldaýyna ıe bolǵan jas kásipkerler sany artyp keledi. Olardyń basym bóligi aýyldyq jerde turady. Grant ıegerleri qural-jabdyqtar satyp alyp, kásipterin keńeıtýge qam jasap jatyr.
Sonyń biri – Jezdi kentiniń turǵyny Gúlnur Janalınova. Ol turatyn kentte osyǵan deıin naýbaıhana bolmaı, jergilikti turǵyndar nan ónimderin ózderi qoldan jasaıtyn nemese Jezqazǵan qalasynan ákeletin edi.
G.Janalınova byltyr oblystyq granttan 2,5 mln teńge utyp alyp, shaǵyn naýbaıhana ashty. Nan ashytatyn apparat, elektr pesh satyp aldy. Qazir ol kúnine 500 bólke nan pisirip, mekemelerge, dúkenderge jetkizip turady. Qaramaǵynda alty adam jumys isteıdi.
«Bıyl qaıtarymsyz grant mólsheri byltyrǵydan joǵary bolady. Sebebi oblysta kásipkerlik salasynda turaqty ósim baıqalǵandyqtan 400 mln teńge kóleminde qaıtarymsyz grant bóliný josparlanyp otyr. Bul qarajat óńirdiń kásipkerlik áleýetin arttyrýǵa baǵyttalady», deıdi Ulytaý oblystyq kásipkerlik jáne ónerkásip basqarmasynyń bólim basshysy Nurjan Saǵyndyq.
Mamandardyń aıtýynsha, bıyl grantqa ótinish berý kezinde IT jáne týrızm salalaryna basymdyq beriledi.
Ulytaý oblysy