Ýnıversıada jarystary sporttyń 12 túri boıynsha ótedi. Olardyń arasynda taý shańǵysy, bıatlon, shańǵy jarysy, shańǵy qossaıysy, shańǵymen tramplınnen sekirý, snoýbord, frıstaıl, mánerlep syrǵanaý, short-trek, konkımen júgirý sporty, shaıbaly hokkeı (erler jáne áıelder arasynda) jáne kıorlıng oıyndary bar.
Ýnıversıadany ótkizýge 127 halyqaralyq tóreshi men 600-ge jýyq ulttyq tehnıkalyq mamandar qatysady. Jarystardy ótkizýge qatysatyn barlyq tóreshilik alqasyn árbir sport túri boıynsha ulttyq jáne halyqaralyq federasııalar bekitedi.
Jarystar «Shymbulaq» taý shańǵysy kýrorty, «Medeý» muz aıdyny, «Suńqar» halyqaralyq shańǵy tramplınder kesheni, Balýan Sholaq atyndaǵy sport jáne mádenıet saraıy, «Alataý» shańǵy jáne bıatlon kesheni, «Tabaǵan» sporttyq oıyn-saýyq kesheni, «Almaty Arena», «Halyq Arena» sport keshenderi sekildi 8 nysanda ótedi.
Ýnıversıadaǵa deıin «Suńqar» HShTK, «Alataý» ShBK, «Shymbulaq» TShK gomologasııanyń halyqaralyq sertıfıkattaryn aldy. Qalǵan nysandar sáıkestik sertıfıkatyn trassalardy ázirlegennen keıin jáne muzdy nysandarda muz daıyndalǵannan keıin alýǵa tıis. Daıyndyq úderisin iske asyrý úshin úlgilik operasııalyq josparlar ázirlendi, onda nysannyń barlyq operasııalary, basqarý júıesi men barlyq qyzmetterdiń jalpylama jumys isteýi sıpattalǵan.
О́tken jyldyń sońyna deıin Ýnıversıada nysandarynda 5 testilik is-shara ótkizildi. Olardy Balýan Sholaq atyndaǵy sport saraıyndaǵy Qazaqstannyń short-trek chempıonatynyń II kezeńi, «Halyq Arenadaǵy» el táýelsizdiginiń 25 jyldyǵyna arnalǵan 18 jasqa deıingi jasóspirimderdiń shaıbaly hokkeıden respýblıkalyq chempıonaty, «Almaty Arenadaǵy» Qazaqstannyń mánerlep syrǵanaýdan ashyq chempıonaty, «Alataý» shańǵy jáne bıatlon stadıonynda Qazaqstan kýbogy aıasyndaǵy FIS Race pen bıatlonnan respýblıka chempıonatyn quraıdy.
Uıymdastyrýshy komıtet Halyqaralyq stýdenttik sport federasııasynyń (FISU) erejelerine sáıkes, 2016 jyldyń 29 qańtarynda, Ýnıversıadanyń bastalýyna bir jyl qalǵanda, ulttyq stýdenttik sport federasııalaryna jarystarǵa qatysýǵa shaqyrý qaǵazdaryn joldady. Qazirgi tańda 56 memleket akkredıtasııadan ótti. Jarys kúnderi «Almaty Towers» bıznes kesheninde Oıyndardy basqarý ortalyǵy jumys isteıtin bolady. Osy jerde Ýnıversıadany ótkizý barysynyń táýliktik onlaın-monıtorıngi júzege asyrylady.
Atalǵan júıe Halyqaralyq stýdenttik sport federasııasynyń usynystaryna sáıkes ázirlengen. Ortalyq «S4 tujyrymdamasy» (tórt aǵylshyn sóziniń abbrevıatýrasy: komanda, baqylaý, kommýnıkasııa jáne úılestirý) dep atalatyn Ýnıversıadanyń zamanaýı tujyrymdamalyq ıdeıasyn qoldanýmen uıymdastyrylady.
«Egemen-aqparat»