Elordamyzdyń qaq ortasynda ornalasqan balabaqsha qazirgi tańda, balalardyń shat kúlkisine tolyp, ata-analardyń júrekjardy lebizderi men aq batalaryn alyp, jemisti jumys jasap jatyr. Balabaqsha 140 búldirshinge arnalǵan. Oqý-tárbıe jumystary elimizdiń memlekettik jalpyǵa birdeı standarttary negizinde júrgiziledi.
Mekemede negizinen 7 top jumys isteıdi. Olardy naqtylaı aıtsam, kishkentaı búldirshinder úshin jasaqtalǵan «Balapan», odan úlkenderge tárbıe berip jatqan «Kójek», «Qulpynaımen» qatar, eresek balalardyń qut mekeni sanalatyn «Qyzǵaldaq», «Shaǵala», sondaı-aq, mektepaldy daıarlyq júrgizetin «Aq kógershin», «Qarlyǵash» toptary bar. Ár topqa qajetti qural-jabdyqtar, oqý-ádistemelik kitaptar jetkilikti. Bıylǵy bir atap óterlik jetistigimiz, balabaqshamyzda ótken qarasha aıynyń basynda mektepke deıingi shaǵyn ortalyq jumys isteı bastady. Qazirgi kezde tarydaı bolyp kirip, taýdaı bolyp shyǵatyn mekteptiń 1-synybyna baratyn balalardy baqshada tııanaqty ázirleý basty mindet bolyp otyr. Biz osyny qazirden bastap qolǵa alyp, búldirshinderdi árip tanyp, san sanaýǵa úıretýdemiz.
Bul ıgilikti shara, ıaǵnı, mektepaldy daıyndyq birinshi aýysymda «Baldáýren» synybynda júzege assa, ekinshi aýysymdaǵy eresek balalar «Kúnshýaq» synybynda ázirlenedi. Taǵy bir atap óterligi, balabaqsha joǵary bilimdi tárbıeshilermen jáne sapaly jumys jasaıtyn qyzmetkerlermen tolyq qamtamasyz etilgen. Oǵan qosa, ujymda tájirıbeli pedagogtar búldirshinderdiń tanymyn keńeıtip, oı-óresin bıiktetý isinde júıeli jumys júrgizip, olardy qazirden bastap birlikke, yntymaqqa, adaldyqqa baýlyp, árqaısysynyń boıyndaǵy qarym-qabiletin ashý jolynda jumys júrgizip keledi. Ásirese, ulttyq rýhanııatymyz, ıaǵnı, ata-babalarymyzdan jalǵasyp kele jatqan ádet-ǵurypty, salt-dástúrdi, óreli ónerdi, óristi qundylyqtarymyzdy tanystyrýdy nazardan tys qaldyryp otyrǵanymyz joq.
Balabaqshamyz tek tárbıe berip, mektepke daıyndyq jumystarymen ǵana shektelmeıdi. Búldirshinderdiń qalalyq baıqaýlarǵa qatysyp, júldeger atanyp júr. Boılary kishkentaı bolǵanymen, oılary bıik ul-qyzdarymyzdyń arasynda alǵys hat, maqtaý qaǵazdaryn alǵandar da barshylyq. Qazaq jurty aldyńǵy tolqyndy ardaqtap, olardyń ónegeli isin keıingi jasqa úlgi etip otyrǵan. Bul jaqsy dástúr bizdiń balabaqshada da jalǵasyn tabýda. Osy arada jyr jampozy Maǵjan Jumabaevtyń ulaǵatty bir sózi oıǵa oralady. «Balany tárbıeshiniń ózindeı qylyp shyǵarmaı, keleshek zamanyna laıyqtap daıyndaý kerek», depti tuńǵysh ulttyq «Pedagogıka» kitabynyń avtory, ardaqty aqyn atamyz. Bul danalyq oı búgingi urpaqty osy qalypta tárbıeleý qajettigin meńzep otyrǵany anyq. Iá, eldiń erteńgi tiregi búgingi baldyrǵandarymyz ekeni sózsiz. Sodan da shyǵar, Elbasy Nursultan Nazarbaev táýelsizdiktiń alǵashqy kúninen bastap jastarǵa barlyq qamqorlyqty jasap keledi. Sonyń sharapatyn bizdiń balabaqshada tárbıelenip kele jatqan búldirshinder kórip jatyr. Bir sózben aıtqanda, otbasynyń da, balabaqshanyń da, mekteptiń de maqsat-múddesi bireý, ol – zaman talabyna saı egemen eldiń urpaǵyna sanaly bilim berý.
Ajar AHMETJANOVA,
№41 «Baldyrǵan» balabaqshasynyń meńgerýshisi