Otbasyn qurǵan erli-zaıyptylardyń ortasynda sábı bolmasa nemese onyń dúnıege kelý merzimi keshikse, bul jaǵdaı olardyń qabaqtaryna kirbiń túsirmeı qoımaıdy. О́kinishke qaraı, búginde balasyz otbasylar qatary kóbeımese, azaıa túsetin túri kórinbeıdi. Árıne, bir perzentke zar bolǵan erli-zaıyptylar búgingi zamanǵy medısınanyń kómegine arqa súıeı otyryp, bala súıe alady. Alaıda, buǵan qol jetkizýdiń múmkindigi birde bolsa, birde bola bermeıdi.
Osy oraıda uzaq jyldan beri tuńǵyshtaryn kútýden úmitterin úzbegen, bir-birine ǵashyq jandardyń saýabyn alyp júrgen júreginiń jylýy mol jan jóninde áńgime órbitýdiń oraıy kelip turǵandaı. Bul Batys Qazaqstan oblystyq máslıhatynyń depýtaty, Qazaqstan halqy Assambleıasy koreı etnomádenı birlestiginiń tóraǵasy Maksım Pak desek, dál ústinen túsemiz.
О́tken jyly Bórli aýdanynda uzaq jyldan beri sábı qushýdy armandap júrgen birneshe erli-zaıypty Ońtústik Koreıanyń astanasy – Seýl klınıkasynda emdelip ári olardyń alǵan emderi oń nátıje berip, kópten kútken tuńǵyshtaryn dúnıege ákeldi. Bul arada Maksım Paktyń osynaý qýanyshqa qatysy qandaı degen saýaldy taǵy bir eske sala ketkenniń artyqshylyǵy bola qoımas. О́ıtkeni, ol Oral óńiri men Seýl klınıkasy jáne Batys Qazaqstan oblystyq Qazaqstan halqy Assambleıasy arasynda ózara kelisimge qol qoıý jónindegi máselege bastamashy bola bildi. Ári atalǵan qujat batysqazaqstandyqtardyń múddeleri men paıdasyna naqty qyzmet jasaı bastaýyna ájeptáýir kúsh-jigeri men aqyl-oıyn sarp etti. Osy arada koreı etnomádenı birlestiginiń tóraǵasy kez kelgen kúrdeli kelisimge kele alatyn mámilegerlik qyrymen de tanyla alǵany anyq. Al bul kelisimniń nátıjesi qandaı bolǵanyn joǵaryda aıtyp ótken edik.
Bizdiń búgingi keıipkerimizdiń pikirinshe, qazaqstandyq jáne koreıalyq mamandar yntymaqtastyǵy men ózara qarym-qatynastarynyń úlken bolashaǵy bar. Al tikeleı ózine qatysty alǵanda, ol óziniń bastamasymen oıǵa alǵan maqsatyn odan ári jalǵastyra túsýdi uıǵarǵan. Onyń aıasy bala súıgisi keletin erli-zaıyptylardy emdetýmen shektelmeıdi. Osy qatarda otolarıngologııa júıesi boıynsha balalarǵa kvota bóldirtý jáne áıelder arasynda kezdesetin onkologııalyq aýrýlardy Seýl klınıkasynda emdetý joldary qarastyrylǵan. Sondaı-aq, búgingi kúni tula boıy qaıyrymdylyq pen izgilikke toly azamattyń basty maqsatynyń biri batysqazaqstandyqtar Ońtústik Koreıa mamandarynan keńes ala alatyn keńse ashý bolyp otyr.
Sózimizdi túıindeı kele aıtaıyn degenimiz, Maksım Pak Qazaqstan halqy Assambleıasynyń rólin tek saıası jáne ekonomıkalyq bastamalardyń ótkizgishi bolýdan ǵana emes, sonymen birge, kóptegen áleýmettik máseleniń sheshimin taba bilýden de kórgendi jón sanaıdy. Munyń, sóz joq, óte ornyqty da baıypty ári naqty shyndyqqa sáıkestendire aıtylǵan oıly pikir ekeni anyq.
Temir QUSAIYN,
«Egemen Qazaqstan»
Batys Qazaqstan oblysy
Sýrette: Maksım PAK kópten kútken tuńǵyshtary dúnıege kelgen baqytty erli-zaıyptylarmen birge