«Koreıanyń Qazaqstannan úıreneri kóp»

Almatyda ótken qysqy Ýnıversıadaǵa 54 elden 2 myńnan astam sportshy, alys-jaqyn shet elderden myńdaǵan jankúıer kelgeni belgili. Solardyń arasynda jerlesterine qoldaý kórsetken ońtústikkoreıalyq Kım Sang Ýk te bar. – Kım Sang myrza, aldymen ózińiz jaıly aıtyp ótseńiz. – Men – Seýl qalasynyń týmasymyn. Qazir ýaqytsha Almatyda Koreıanyń kon­sýl­dyǵynda qyzmet atqaramyn. Sonymen qatar, koreıalyq «Kore ılbo» gazetiniń Al­ma­tydaǵy bólimshesin bas­qaryp otyrmyn. Zaıybym, qyzym úsheý­miz Ýnıversıada týraly gazetimizge maqalalar jazyp, sýretke túsirip, jarııaladyq. – Keler jyly qysqy Olımpıada sizdiń elde ótedi. Osyǵan baılanysty Seýlden Almatyǵa arnaıy delegattar kelgen bolar? – Árıne, jerlesterim kelip, biraz tájirıbe jınaqtap ketti. Ashylý saltanatynan jasalǵan teatrlandyrylǵan kórinisti tamashalady. Bizdiń eldiń tarıhy da áride jatyr ǵoı. Sol jaǵynan olar kóp oılandy. Men Qazaqstannyń birneshe qalasyn aralaǵanymdy, sizder týraly bilgenderimdi aıttym. Qonaqjaı halyq ekenderińizdi kórdi. Qaýipsizdik sharasy, jankúıerlerdiń stadıonǵa qalaı kirip, qalaı shyǵyp jatqany, sportshylarǵa qoldaý bildirý úshin qosymsha atrıbýttardyń taratylýy sekildi usaq-túıek máselelerdi de qaperine alǵan uıymdastyrýshylarǵa bizdiń azamattar tánti boldy. Tipti, tazalyq jaǵy da eskerilgen. Mysal retinde aıtaıyn, qonaqtar Koreıadan kelgende Almatyda qalyń qar jaýyp turǵan edi. Munshama qardy tazalaý problema týdyrady dep oılasa kerek, jerlesterim tańerteń kóshege shyqqanda: «Kım Sang, keshegi qardyń barlyǵy qaıda ketken?», dep tańdanystaryn jasyra almady. Men kólik qozǵalysyna kedergi bolmaýy úshin tazalyqqa jaýap beretin adamdar túni boıy jumys istegenin aıttym. Tizbekteı bersem, osyndaı mysaldar kóp. Bir sózben aıtqanda, uıymdastyrý jaǵynan Koreıanyń Qazaqstannan úıreneri kóp. – Qar demekshi, qysta aýa raıynyń temperatýrasy nólden joǵary bolatyn Koreıa úshin keler jyly Olım­pıadany ótkizý qıynǵa soqpaı ma? – Shyny kerek, Qazaqstan tabıǵı baılyǵy jaǵynan da, aýa raıy tur­ǵy­synan da problemasy joq el der edim. Biz bul jaǵynan maqtana almaımyz. Biraq qazir tehnıka zamany emes pe? Jasandy qar degen bolady. Eger qar jet­peı jatsa, sý quısań, ony ekinshi jaǵynan qar etip shyǵaratyn apparat bar, sony paıdalanýǵa bolady. Biraq, ol tabıǵı qarǵa jet­peıtini taǵy bar. Soǵan qaramastan, barlyǵy oı­da­ǵydaı bolady dep senemin. – Sońǵy kezde Koreıa sportshylary jazǵy jáne qysqy Olım­pıa­dalarda únemi úzdik ondyq­tan kó­rinýde. Búgingi Ýnıversıadada úzdik úshtikke kirdi. Mundaı jetis­tikke qalaı jettińizder? – Koreıa sporty qarqyndy damymasa da, óz deńgeıinde deýge bolady. Ásirese, konkıshiler men short-trekshilerdi aýyz toltyryp aıtýǵa bolady. Qysqy Ýnıversıadada osy eki sport túrlerinen jerlesterim 11 altyn, 5 kúmis jáne 5 qo­la medal enshiledi. Sonyń arqasynda beı­resmı komandalyq esepte úshinshi oryn aldyq. Short-trekten kóptegen koreı sportshysy men bapkeri ózge el­derde júr. Reseıge Olımpıadada úsh altyn alyp bergen Vıktor An da ýaqy­tynda bizdiń eldiń atynan synǵa túsip, Olımpıada chempıony bolǵan. Sizderdiń quramalaryńyzǵa da bizdiń elden bir qyz keldi. – Sport basshylarynyń short-trekten qyzdar komandasyn kú­sheıtý úshin jasaǵan amaly bolýy kerek. – Árıne, oǵan talasym joq. Fede­­ra­sııalaryńyzdyń mundaı qa­damǵa barýynyń birden-bir sebebi – ha­lyqaralyq jarystarda nátıje kórsetý. Sol arqyly bul sportty halyqqa keńinen tanyta alatynyn túsinip otyr. О́kinishke qaraı, Ýnı­versıadada Kım Eng A besinshi oryn alyp, bıik tuǵyrdan kórine almady. Al komandalyq saıysta qyzdaryńyz jarady. Azýly Japonııa quramasyn artqa tastap, qola júldege qol jetkizdi. Bastamasy jaman emes. – Áńgimeńizge rahmet. Áńgimelesken Almas MANAP, «Egemen Qazaqstan» ALMATY