Qostanaı oblysynda medısınalyq qaldyqtardy otqa jaǵatyn qondyrǵynyń ornyn endi avtoklav almastyrady. Ol qorshaǵan ortanyń organıkalyq zııandy qaldyqtarmen lastanýyn azaıtý baǵytyndaǵy BUU damý baǵdarlamasy, Álemdik ekologııalyq qor jáne QR Energetıka mınıstrliginiń birlesken PROON jobasy sheńberinde júrgizilgen jumystar nátıjesinde múmkin boldy. Medısınalyq qaldyqtardy qysymnyń kúshimen zalasyzdandyratyn avtoklavtyń qorshaǵan ortaǵa eshqandaı zııany joq, óıtkeni óńdeý kezinde medısınalyq qaldyqtar burynǵydaı ýly zattar bólmeıdi.
«Qazaqstanda medısınalyq qaldyqtardy qaýipsiz etý júıesin qalyptastyrý qaldyqtardy azaıtý, olardy óńdep, ekinshi ret paıdalaný maqsatynda qolǵa alyndy. Jańa tehnologııalardy paıdalaný elde óndiristiń ósýimen birge qorshaǵan ortany taza ustap, adamdar densaýlyǵyn saqtaı otyryp, damýdy qamtamasyz etedi», dedi PROON-nyń Qazaqstan Respýlıkasyndaǵy turaqty tóraıymy Mýnhtýı Altangerel.
Qazir barlyq medısınalyq qaldyqtardyń 90 paıyzy peshke jaǵý arqyly joıylyp otyrylady. Al qaldyqtar janǵan kezde odan óte ýly dıoksın bólinedi. Dıoksın adamdardyń endokrındik, júıke, ımmýndyq júıesin álsiretip, qaýipti aýrýlar týdyrady.
Joba ókilderiniń aıtýyna qaraǵanda, avtoklav qondyrǵysy ázirge Shyǵys Qazaqstan, Qostanaı oblystary men Astana qalasynda ornatylady. «Biz avtoklav qondyrǵysyn qolaıly ǵımaratqa ornattyq. Jobamen birlesken jumysymyz óziniń jemisin beretin bolady. Bul oblys óńirinde ekologııalyq tazalyqtyń saqtalýyna batyl qadamnyń biri boldy», dedi Qostanaı oblysy ákiminiń orynbasary Sergeı Karplıýk.
Qostanaı oblysynda jyl saıyn 300-400 tonna medısınalyq qaldyq órteledi. Olardyń bir kılogramyn jaǵýǵa 200 teńge shyǵyn ketedi. Áńgime shyǵynnan buryn zııanynda bolsa kerek. Oblysta aldaǵy ýaqytta 4 avtoklav jumys isteıtin bolady. Olar múmkindiginshe oblys óńirindegi aýrýhanalardan shyqqan medısınalyq qaldyqtardy zalasyzdandyrady.
QR Energetıka mınıstrligi Qaldyqtardy basqarý departamentiniń dırektory Jan Nurbekov medısınadyq qaldyqtardy zalasyzdandyratyn mundaı úzdik qondyrǵylar aldaǵy ýaqytta oblystardyń barlyǵynda bolýy kerektigin aıtty.
Názıra Járimbetova, «Egemen Qazaqstan»