Astanada el Táýelsizdiginiń 20 jyldyǵyna arnalǵan III Ulttyq «Qazaqstan mıssısi – 2011» konkýrsynyń fınaly ótti.
«Sezon» jýrnaly jáne Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa uıymdastyrǵan bul konkýrstyń maqsaty – ana bolýdy ulttyq ıdeıa retinde nasıhattaý, turmystaǵy áıelderdiń róli men mártebesin kóterý, eń bastysy otbasy qundylyqtaryn memlekettiń berik irgetasy retinde nasıhattaý.
Sondaı-aq, konkýrs qoǵamnyń moraldyq-adamgershilik ustanymdaryn, birlik pen kelisimdi nyǵaıtýǵa, ultty biriktirýge baǵyttalǵan. «Qazaqstan mıssısi – 2011» konkýrsyna qatysýshylarǵa qoıylatyn basty sharttardyń biri – olardyń otbasylarynyń balalarynyń bolýy ekendigin jáne osy sharaǵa oraı satylatyn bıletterden túsken qarajat jetim jáne ata-analarynyń qamqorlyǵynsyz qalǵan jetkinshekterge qoldaý retinde balalar úılerine jiberiletinin de aıta ketken jón.
Sonymen Astanada ótken sheshýshi fınalǵa elimizdiń túkpir-túkpirinen, naqtylap aıtqanda ár óńirde ótken týrlarda jeńimpaz atanǵan 20 áıel qatysty. Sahnaǵa toptala shyqqan osy áıelder eń aldymen, jurtshylyq aldynda ózin-ózi tanystyrǵan bolsa, budan keıin olar ózderiniń bolmys-bitimin, ıntellektýaldyq áleýetin, talǵam-talabyn, bilim-biligin kórsetetin suraqtarǵa jaýap berdi.
Nátıjesinde bas júldeni almatylyq, alty balanyń anasy Vıktorııa Momynbaeva jeńip alsa, birinshi oryndy da almatylyq bes bala tárbıelep otyrǵan ana Aqnur Jumabaeva ıelendi. Al II oryn Semeıden kelgen Olga Saǵyndyqovaǵa buıyrdy. Bir aıta ketetin jaıt, qazaq tilinde taza sóıleıtin Olga dombyramen kúı tartýda da ózge qurbylarynan oq boıy ozyq kórindi.