Medısına salasyndaǵy bilim berý júıesin jańǵyrtý aıasynda Qazaqstandaǵy joǵarǵy oqý oryndary halyqaralyq tájirıbeni zerttep jatyr. «Jetekshi sheteldik ýnıversıtetter men medısınalyq JOO arasyndaǵy strategııalyq seriktestiktiń birinshi kezeńin qorytyndylaý týraly» halyqaralyq konferensııa aıasynda otandyq mamandardy qyzyqtyrǵan tájirıbeniń biri – joǵarǵy oqý oryndaryna mektep túlekterin emes, medısınalyq kolledji támámdaǵan stýdentterdi qabyldaý júıesi.
«Kez kelgen salanyń damýy nemese quldyraýy kadrǵa baılanysty. Halyqaralyq tájirıbeni eskere otyryp, medısınalyq bilim berýdiń jańa modelin júzege asyrǵymyz keledi. Bul model stýdentterdi irikteýge qatysty. Sondyqtan, tańdaý jasaý kerek, mektepte bıologııa men hımııa pánderin tereńdetip oqyǵan oqýshylardy ma, álde medısınalyq kolledjerde oqyǵan «daıyn» mamandardy qabyldaımyz ba?!» - dedi Densaýlyq saqtaý jáne áleýmettik damý mınıstri Tamara Dúısenova.
Jalpy, mınıstr atap ótkendeı, medısına salasyndaǵy bilimdi jetildirý úshin otandyq alty ýnıversıtet halyqaralyq alty ýnıversıtetpen strategııalyq baılanys ornatqan eken. Onyń tórteýi – AQSh ýnıversıteti bolsa, ekeýi – Eýropanyń bilim berý oryndary eken.
Konferensııa barysynda S.J. Asfendııarov atyndaǵy Qazaq ulttyq medısınalyq ýnıversıteti jáne Dıýk ýnıversıteti (AQSh), Batys Qazaqstan memlekettik medısınalyq ýnıversıteti jáne K. Marsınkov atyndaǵy Poznan medısınalyq ýnıversıteti (Polsha), Ońtústik Qazaqstan memlekettik farmasevtıkalyq akademııasy jáne Gdan medısınalyq ýnıversıteti (Polsha), Qaraǵandy memlekettik medısınalyq ýnıversıteti jáne Lýnd ýnıversıteti (Shvesııa), Semeı qalasynyń memlekettik medısına ýnıversıteti jáne Sent-Lýıs ýnıversıteti (AQSh), Astana medısına ýnıversıteti jáne La Sapıensa ýnıversıtetteriniń (Italııa) strategııalyq áriptestiktiń 2016 jylǵa jumysyn qorytyndylady. 2017-2018 jyldarǵa arnalǵan JOO-nyń strategııalyq seriktestikteriniń maqsattarymen mindetteri, sonymen qatar Qazaqstandaǵy medısınalyq bilimdi reformalaýdyń negizgi kezeńderi talqylandy.