Kókshetaýdaǵy №19 orta mekteptiń bazasynda jabyq ǵımarattardaǵy týrıstik kópsaıystan birinshilik ótkizildi. Atalmysh sharany Aqmola oblystyq bilim basqarmasyna qarasty balalar men jasóspirimder týrızmi, ólketaný jáne ekologııa ortalyǵynyń ókilderi uıymdastyrdy.
Týrıadanyń birinshi kezeńine qatysý úshin sportshylar oblystyń barlyq aımaǵynan jınaldy.
Sharany ótkizýdegi basty maqsat týrıstik kópsaıysty damytý men nasıhattaý, tehnıkalyq sheberlikti shyńdap, myqty degen sportshylar men komandalardy anyqtaý jáne oblys pen qala quramasyn jasaqtaý boldy.
Eki kúnge sozylǵan tartysty jarystan soń myqtylar anyqtaldy. Qazylar alqasynyń sheshimimen Sandyqtaý aýdanynan kelgen «Arystan» komandasy jeńimpaz tuǵyryna kóterildi. Ekinshi oryndy «Fırn-2» komandasy jeńip alsa, júldeli úshinshi oryn Sandyqtaý aýdandyq balalar úıiniń «Saıahat» komandasy enshisine tıdi.
Jasóspirimder tobynda Kókshetaýdyń «Jas qaırat-2» komandasy úzdik dep tanyldy. Ekinshi oryndy «Fırn-3» komandasy jeńip aldy. Al úshinshi orynǵa Aqkól aýdanynan kelgen «Aqkól-3» komandasy kóterildi.
Eresekter arasynda Kókshetaýdyń «Jas qaırat» ujymy birinshi oryndy jeńip alsa, «Fırn» jáne «Fırn-4» komandalary ekinshi-úshinshi oryndardy ózara bólisti.
Týrıadanyń úzdik degen sportshylary respýblıkalyq jarystarǵa qatysý úshin Aqmola oblysy quramasynyń sapyna enetin bolady.
Baqbergen AMALBEK,
«Egemen Qazaqstan»
Aqmola oblysy