Otanshyldyq otbasynan bastalady

Táýelsizdikti nyǵaıtýdyń basty sharttarynyń biri eldiń birligin, halyqtyń yntymaǵyn, ózara týystyǵyn, bir-birin syı­laýyn qamtamasyz etý bolyp tabylady. Muny júzege asyrýdyń birden-bir joly – jas urpaqty ultyna, jynysyna, túr-túsine, dinı senimine, jas ereksheligine qaramastan, olardyń ortaq Otany – Qazaqstanǵa degen ystyq yqylasyn, súıispenshiligin, qurmetteý-qasterleý sezimin qa­lyp­tastyrý kerek. Bul – jas­tardyń eline, jerine, ortaq úıine – Otanyna degen sheksiz beril­gendigin, patrıotızmin qalyp­tastyrý degendi bildiredi. Patrıottyq týa bitken qa­sıet emes, ol bir kúnniń, bir jyl­dyń jemisi de emes. Ol tárbıe arqyly balabaqshada, otbasynda, mektepte, joǵary oqý ornynda, jumys istegen ujymda, bir sózben aıtqanda, áleýmettik ortada qalyptasady. «Tárbıe basy – tal besik» degen maqal­dyń tamyryna bir sát úńilsek, sol kóp salaly tárbıeniń eń bastysy: otbasynda – Otandy súıetin, adamgershiligi mol, eńbekqor, óz Otanyna, halqyna adal qyzmet etýge daıyn sanaly da sapaly azamat tárbıeleý. Sonymen birge, qazaqtyń árbir ul-qyzy óz halqynyń tegin, tarıhyn bilgende ǵana naǵyz patrıot bola alady. Osy oraıda, elimizdiń Memlekettik rámizderin, olardyń tereń maǵynalyq sıpatyn bilip, qasterleý – halyqty baýyrmaldyqqa, súıispenshilikke biriktiredi, birlikke, yntymaqqa, eńbekke jumyldyrady, patrıot­tyq rýhyn kóterýge shaqyrady degen tujyrymdar meniń sanamda berik oryn alady. Búgingi kúni jas urpaqqa bilim men tárbıe berýdiń basty maqsaty - Otannyń laıyqty uldaryn qalyp­tastyrý bolyp otyr. Otanshyl bolý – bir-birińe baýyrmal bolý. «Jaqynyńdy jattaı syıla, jat janynan túńilsin» deıdi dana halqymyz. «Birińdi qazaq, biriń dos kórmeseń, istiń bári bos» deıdi kemeńger Abaı. Túısigi bar adamǵa osydan artyq aıtylar aqyl bolmas. Yntymaǵy jarasqan eldi kórgende, jaýdyń quty qashady. Birligimiz barda tas qamaldaı berikpiz. Úsh ǵasyr boıyna kisi qolyna telmirgen qazaq halqy bar múddesin tek osy bastan keship otyrǵan qazirgi kezeńde ǵana, óziniń baıyrǵy mekeni – Qazaqstanda ǵana tolyǵymen júzege asyra alady. Endeshe, qazaq balasy, qaıda týyp, qaıda júrse de, erteńgi urpaǵynyń bolashaǵyn óz atamekenimen tyǵyz baılanystyryp, búgingideı álem­dik deńgeıdegi múdde túgendesý kezeńinde týǵan topyraqqa degen súıispenshilikterin dáleldep, jas táýelsizdiktiń buǵanasyn bekitip, qabyrǵasyn qataıtýǵa tikeleı atsalyspaǵy shart. Olaı bolsa, otan­shyl bol, qazaqtyń jas urpaǵy! Aqjibek QOJAHMETOVA, «Oktıabr orta mektebi» MM qazaq tili men ádebıet pániniń muǵalimi Qostanaı oblysy, Qarasý aýdany