2017 jyldyń 1 qyrkúıeginen bastap Qazaqstanda joǵary tehnologııalyq jańa bırja jumys isteıtin bolady. Bul týraly búgin «Astana» Halyqaralyq qarjy ortalyǵynyń basqarýshysy Qaırat Kelimbetov habarlady.
«2017 jyldyń 1 qyrkúıeginen bastap, Qazaqstanda joǵary tehnologııalyq jańa bırja jumys isteıtin bolady. Astana Innovation jáne Aqparat mınıstrligimen birge onyń belgili bir platformalaryn jańa blokcheın sheshimderdiń negizinde jasaýymyz yqtımal. Taǵy bir mańyzdy isterdiń biri - atalmysh bırjada «Samuryq-Qazyna» kompanııasyn jekeshelendirý ótedi. Bul kompanııa - Qazaqstannyń JIО́-niń 40 paıyzy. Kelesi jyly onda táýelsiz qarjy soty, jańa arbıtraj ortalyǵy ashylady. Olar búkil postkeńestik memleketterdiń sot júıeleriniń ortaq ortalyǵyna aınalýy múmkin, sebebi bunda alǵash ret bizdiń aımaqta aǵylshyn quqyǵy prınsıpteri qoldanylatyn bolady. Osynyń barlyǵy tolyq 2018 jyldyń 1 qańtarynan bastap júzege asady», - dedi Kelimbetov ASTEX Astana Smart City 2016 forýmynda.
Sonymen qatar, onyń aıtýynsha, 2017 jyldyń 1 shildesinen bastap, halyqaralyq qarjy ortalyǵynyń qatysýshylaryn tirkeý bastalady.
«Prezıdenttiń tapsyrmasymen 2017 jyly Astanada ótetin EKSPO kórmesiniń bazasynda Halyqaralyq qarjy ortalyǵyn qurý týraly tapsyrmasy bar. 2017 jyldyń 1 shildesinen bastap, qarjy ortalyǵyna qatysatyn kompanııalardy tirkeýdi bastamaqpyz. Olar buryn-sońdy bolmaǵan jeńildikter alady, bul - vızalyq jáne eńbek rejimderiniń jeńildetilgen túri. Eger olar beıindi qyzmet túrlerimen - kapıtaldar naryǵy, aktıvtermen basqarý, ıslamdyq qarjylandyrý, jańa qarjylyq tehnologııalarmen aınalysatyn bolsa, 50 jylǵa salyqtan bosatý syndy jeńildikter qarastyrylǵan», - dep atap ótti ol.
Aıta ketý kerek, Astanadaǵy atalmysh forýmǵa AQSh, Eýropa, TMD elderinen 300-den astam meıman kelip otyr.