«Halqyńyz ózińizdi kórnekti memleket jáne qoǵam qaıratkeri, bedeldi ǵalym, ultjandy abyz aqsaqalymyz retinde jaqsy biledi ári qadirleıdi. Siz kezinde QazMÝ-di bitirgennen keıin, kóp jyl boıy osy bilim uıasynda jemisti eńbek ettińiz. Qazaq ádebıetiniń ózekti taqyryptary boıynsha zertteýler júrgizip, bertin kele úlken akademık ǵalym atandyńyz. Eńbekterińiz jurtshylyqtyń rýhanı ıgiligine aınaldy. О́mirlik soqpaǵyńyz sizdi joǵary oqý oryndarynyń rektory, elimizdiń Bilim mınıstri, Qazaqstannyń Memleket keńesshisi, QR Premer-Mınıstriniń orynbasary, Tótenshe jáne ókiletti elshi jáne basqa da asa jaýapty qyzmettik laýazymdarǵa alyp keldi. Siz sonyń bárinen de senim údesinen shyǵyp, kemel bilimińiz ben baı tájirıbeńizdi elimizdiń Táýelsizdigin nyǵaıtý isine arnaı bildińiz. Júırik qalamyńyz arqyly árdaıym elimizdegi saıası turaqtylyqtyń nyǵaıýyna, halqymyzdyń bereke-birliginiń artýyna dara pýblısıstik únińizdi qosyp kelesiz. Densaýlyǵyńyz myqty, otbasyńyz aman-esen bolyp, osy eńbekterińizdiń jemisin uzaǵynan kórip, balalaryńyz ben nemerelerińizdiń meıir-shapaǵatyna bólene berińiz!» - dep atap ótilgen Memleket basshysynyń quttyqtaýynda.
Myrzataı Joldasbekuly 1937 jyly Qarataýdyń qoınaýynda, Talastyń boıynda, Aqtóbe degen aýylda dúnıege keldi. «El taǵdyry - Er taǵdyry» kitabynda M. Joldasbekov óz ómirbaıanyn jipke tizgen monshaqtaı baıandaıdy. 1955 jyly ol Almatyǵa kelip, Qazaq memlekettik ýnıversıtetiniń fılologııa fakýltetine oqýǵa túsedi. Ǵalymnyń jarqyn joly osydan bastalady. Muhtar Áýezov, Álkeı Marǵulan, Esmaǵambet Ysmaıylov, Beısenbaı Kenjebaev, Muhametjan Qarataev, Nyǵmet Saýranbaev, Zeınolla Qabdolov sekildi ǵulama ǵalymdardan dáris alady. Ǵalym memlekettik qyzmette, at ústinde júrse de qalamyn qolynan bir kún tastaǵan emes. Ata tarıhy, ertedegi ádebıet tarıhy, jyraýlar murasy, Jambyl jáne Kenendi zertteýge arnalǵan eńbekteri qazaq ádebıettaný ǵylymynyń altyn qazynasyn quraıdy.