Álııa Nazarbaevanyń «Jandaný álemi» jekemenshik qory men Qazaqstan Respýblıkasynyń Tuńǵysh Prezıdenti − Elbasy qory, Mádenıet jáne sport mınıstrliginiń qoldaýymen bastaý alǵan bul baıqaýǵa balalardyń qyzyǵýshylyǵy joǵary. «Irikteý kezeńine 107 bala qatysty. Olardyń arasynda alys aýyldardan arnaıy kelgender de bar», – deıdi joba menedjeri Álııa Syzdyqova.
Jaıyq jaǵasyndaǵy talantty da talapty oqýshylardyń ónerin saralaıtyn qazylar alqasyna belgili ánshi Serik Ibragımov tóraǵalyq etti. Juldyzdy tálimger Atyraýdaǵy eń jarqyn daýysty tańdaý biraz qıynǵa soqqanyn aıtady. Júzden astam ónerpazdyń arasynan bir ǵana júldeger respýblıkalyq kezeńge joldama alady. Dinmuhammed Nurqabaev sol bıikten kórindi.
Atyraý qalasyndaǵy «Fantazııa» vokal stýdııasynda dáris alatyn D.Nurqabaevtyń jasy 12-de. Án aıtyp qana qoımaıdy, fortepıanoda sheber oınaıdy. «О́tken jyly da osy baıqaýǵa qatysyp, alǵashqy úshtikten kórinip edik. Bıyl jeńiske jetetinimizge senimdi boldyq. D.Nurqabaev mýzyka mektebine barady. Onyń bar arman-maqsaty ónermen baılanysty», deıdi anasy Janna Nurqabaeva. Endi jas ánshi Almaty qalasynda ótetin baıqaýdyń fınalynda Serik Ibragımovpen birge án salady.
Baqytgúl BABASh, «Egemen Qazaqstan»
ATYRAÝ