Petropavl qalasynyń ákimi Marat Tasmaǵanbetovtiń aıtýynsha, basty shahardy sanıtarlyq tazalaý jáne abattandyrý boıynsha úshaılyq aıasynda josparly jumys júrgizilýde. Onyń ishinde estetıkalyq talaptarǵa sáıkes kelmeıtin bógetter men qorshaýlar alynýda. Jabyq qorshaý ıelerine torly polımerli jabylǵy túrindegi zamanaýı eýroqorshaýlardyń balamaly túrleri usynyldy.
Qumar Irgebaıuly qalany abattandyrý tek qana sánsiz qorshaýlardy alyp tastaý ǵana emes, ol oblys ortalyǵyn kógaldandyrý, kóshe joldaryn, baqtardy, Qazaqstan Konstıtýsııasy kóshesin, aýlalardy qalpyna keltirý ekendigin atap aıtty.
«Búgingi kúni «qyzyl beldeýlerge», ıaǵnı kommýnıkasııalar ótetin aýmaqtarǵa is júzinde ǵana emes, moraldyq jaǵynan da eskirgen dúńgirshikter men saýda núkteleri salynǵan. Olar qalanyń bet-beınesin buzyp tur, estetıkalyq talaptarǵa jaýap bermeıdi. Ashyq túrde saýda jasaıtyn bazarlar kóp. «Qyzyl beldeýde» turǵan nysandar, baqylaýsyz saýda oryndary alynyp tastalatyn bolsyn», dep aımaq basshysy qatań eskertti.
Oblys ákimi «Bereke» shaǵynaýdanyn abattandyrý jaǵdaıyna da erekshe nazar aýdardy.
«Ásem aýdan boı kóterip keledi. Onda qurylys qarqyndy júrgizilýde. Alaıda, ony kórkeıtý isinde sheshimin kútken máseleler óte kóp. Aýlalarda tolyǵymen antısanıtarlyq jaǵdaı oryn alǵan. Qurylys qarqyndy, al aýmaǵy adam kórgisiz. Abattandyrý úshin jaqsy jospar daıyndalmaǵan. «Bereke» qalanyń eń kórikti shaǵynaýdandarynyń biri bolýy tıis», dedi óńir basshysy.
Bul aýmaqta janǵa jaıly logıstıkany qamtamasyz etý, bıýdjette jańa joldar salý qarastyrylǵan.
Talqylaý barysynda vokzal alańyndaǵy «qyzyl beldeýlerge» ornalasqan nysandar da qatty synǵa alyndy.
О́mir Esqalı, «Egemen Qazaqstan»