Aqtóbede mı ólimi dep dıagnoz qoıylǵan jigittiń búıregi kezekte turǵan 1971 jáne 1973 jyldary dúnıege kelgen eki áıelge salyndy. Buǵan ómirden ótken jigittiń týysqandary kelisim bergen. Atalǵan eki naýqas ta buǵan deıin gemodıalız ortalyǵynda em alyp kelipti.
«Saraptamalar sáıkes kelgennen keıin birden ota jasaýǵa kiristik. Ota sátti ótti. Qazir naýqastardyń jaǵdaıy qalypty. Olar dárigerlerdiń baqylaýynda», dedi oblystyq densaýlyq saqtaý basqarmasynyń bas hırýrgi Erlan Sultangereev.
Bul oblysta jyl basynan beri máıit transplantasııasy boıynsha jasalǵan altynshy ota eken. Sondaı-aq, qazirgi kúni aqtóbelik dárigerler búırek aýystyrý otasyn eshkimniń kómeginsiz ózderi jasap júr.
Oblystyq densaýlyq saqtaý basqarmasynyń basshysy Áset Qalıevtiń aıtýynsha buǵan deıin búırek jáne baýyr sekildi aǵza músheleri aýyr naýqastaǵy adamǵa tek týǵan-týysqandarynan ǵana alynyp kelgen. Al sońǵy ýaqytta óńir turǵyndary máıit donorlyǵyna da oń kózqaras tanyta bastapty.
Temir QUSAIYN, «Egemen Qazaqstan»