Almaty memlekettik kólik jáne kommýnıkasııalar kolledjinde ótken jıynǵa shahardaǵy 82 kolledj dırektorlary men muǵalimderi, Almaty qalasy Bilim basqarmasynyń basshylyǵy, belsendi stýdentter, «Nur Otan» partııasynyń «Jas Otan» jastar qanatynyń músheleri qatysty.
Memleket pen qoǵam úshin saldary aýyr qıyndyqtar týdyryp, qater tóndiretin jemqorlyq qaýipterine, demokratııalyq ınstıtýttar bedeliniń, ádeptik qundylyqtar men ádildiktiń tómendeýine alańdaýshylyq bildirgen QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń ókilderi paraqorlyqtyń elimizdiń búkil bilim júıesine tóndirer qaýip-qaterin túsindire kele, Almaty qalasy kolledjderiniń atalmysh Hartııany qabyldaýy arqyly sybaılas jemqorlyqtyń aldyn alýda úlken úles qosatynyn atap ótti.
QR memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamenti basshysynyń orynbasary Gennadıı Danııarov óz sózinde kolledj stýdentterin rýhanı adamgershik pen azamattyq-patrıottyq jolynda tárbıeleýdiń basty quraldarynyń biri – adaldyqty, sybaılas jemqorlyqqa qarsy tura bilý mádenıetin, saıası-quqyqtyq bilimin, adamgershilik-etıkalyq qundylyqtaryn qalyptastyrý – búgingi kúnniń basty talaby ekenin aıtty. Bilim júıesindegi sybaılas jemqorlyq qaýpiniń túrli deńgeıli qaterlerine toqtala kele, Gennadıı Qojahmetuly: «Bilim alǵan ordasynan sybaılas jemqorlyq ádetin juqtyryp, onyń jasalý tetikterin tanyp-bilgen túlek erteńgi kúni belgili bir mamandyq ıesi atanyp, memlekettik basqarý organdarynyń, qarjy, ekonomıka jáne basqa da naryqtyq qurylymdardyń qyzmetkerine aınalǵanda eldiń konstıtýsııalyq negizderine, ulttyq qaýipsizdigine orasan qaýip tóndiretin tulǵaǵa aınalýy múmkin», – dedi.
Elbasynyń «Máńgilik el» ulttyq ıdeıasyndaǵy adamgershilik qaǵıdattaryn negizge ala otyryp, órkenıetti elge aınalý jolynda óskeleń urpaqtyń alar orny erekshe ekendigine toqtalǵan Almaty qalasy Bilim basqarmasy basshysynyń orynbasary Lázzat Jylqybaeva: «Bıylǵy jyly memleket tarapynan aqysyz bilim berý maqsatynda kolledjderge 2500 oryn bólip otyr. Iаǵnı, bıyl 2500 bala tegin bilim ala almaq. 9-shy nemese 11-shi synyptan keıin Almatyǵa aǵylǵan jastar bazar jaǵalap júrip qalmaı, eń bolmasa, arnaıy bilim alýy tıis. Qazir jalpy naryq, ásirese Almaty qalasy tehnıkalyq jáne kásiptik orta bilimi bar mamandarǵa asa zárý bolyp otyr. Oǵan Ýnıversıadany uıymdastyrý barysynda aıryqsha kózimiz jetken edi. Máselen, 50-ge jýyq qyzmetkeri bar bir qonaqúı ashylsa, onyń ary ketse úsheýi ǵana basshylyq qyzmet atqarýy múmkin, al qalǵan 45-i orta kásiptik bilimi bar qyzmetkerler bolmaq. Iаǵnı, Sizder oqytqan túlekter biliktiligine qoǵamnyń asa zárý ekenin umytpaǵaısyzdar. Al sol túlekterdiń erteńgi kúni memleketimizdiń órkendeýi jolynda aıanbaı eńbek etýine, adal da ádil bolyna yqpal etýshi, baǵyt-baǵdar kórsetýshi orta – ózi bilim alǵan oqý orny ekenin esten shyǵarmasańyzdar eken», – deı kele, tehnıkalyq jáne kásiptik bilim júıesinde eńbek etip jatqan ustazdardy oqý oryndaryndaǵy jemqorlyq faktilerin ashý jolynda jumyla atsalysýǵa shaqyrdy.
Bilim salasyndaǵy bilimge qoljetimdiliktiń sapasy men ádilettiligine meılinshe teris áser etetin, jeke paıda tabý úshin óz qyzmettik babyn paıdalanatyn sybaılas jemqorlyqty boldyrmaý tásilderiniń biri – jarııalylyq ekenin aıtqan Almaty qalalyq fılıalynyń «Jas Otan» jastar qanatynyń tóraǵasy Mádı Ahmetov óz usynysyn bildirdi: «Elbasynyń «Bolashaqqa baǵdar: rýhanı jańǵyrý» degen maqalasynda ashyq qoǵam qalyptastyrýdyń mańyzyn atap ótti, ıaǵnı, ashyq qoǵam – jemqorlyqqa múldem tosqaýyl qoıý ekeni túsinikti. Stýdentter jemqorlyq faktilerin ashyq aıtýdan qorqyp, kóp jaǵdaıdy jasyryp qalýy múmkin. Sondyqtan árbir kolledjde «Aqparattyq burysh» ashyp, oǵan shaǵyn jáshik qoısaq jáne belgili bir nómir boıynsha habarlasýǵa qolaıly telefon jelisin ashsaq, kez kelgen stýdent nemese qyzmetker sybaılas jemqorlyqqa qarsy turýǵa úles qosyp, ashyqtyqqa umtylar edi».
Uıymdastyrýshylar jınalǵan qaýymǵa para alýǵa qatysty oı salar, ashy sabaq bolar vıdeorolıkter kórsetildi.
Aıta ketsek, QR memlekettik qyzmet isteri jáne sybaılas jemqorlyqqa qarsy is-qımyl agenttigi men Bilim jáne ǵylym mınıstrliginiń bilim salasyndaǵy sybaılas jemqorlyqtyń aldyn alý, boldyrmaý jáne sybaılas jemqorlyqqa qarsy mádenıetti qalyptastyrý týraly 2015 jylǵy memorandýmyna sáıkes, bıylǵy jyldan bastap barlyq oqý oryndary, onyń ishinde, 31 mamyr kúni Almatydaǵy 38 joǵary oqý orny qol qoıǵan Hartııada sybaılas jemqorlyqqa qarsy jumys isteýdiń negizgi baǵyttary men maqsat-mindetteri aıqyn kórsetilgen.
Mıra BAIBEK, «Egemen Qazaqstan»