Baspananyń bir sharshy metri 100 myń teńgeden aspaıdy. Úleskerler onyń bekitilgen eskızderin óz qalaýlarymen tańdaı alady.
Petropavl qalasynyń ákimi Marat Tasmaǵanbetovtiń aıtýynsha, aýqymdy jobany jergilikti qurylys kompanııalary biryńǵaı arhıtektýralyq úlgide salyp beredi. Negizinen otandyq materıaldar paıdalanylady. Úsh jylǵa deıin sapa kepildigi beriledi. Keıin baspanalardy ortalyqtandyrylǵan jylýmen qamtý máselesi qarastyrylatyn bolady.
«Solnechnyı» kentine ınjenerlik-kommýnıkasııalyq ınfraqurylymdar tartý úshin el qazynasynan 1 mıllıard 200 mıllıon teńge bólingen. Bul qarajat esebinen jańa salynatyn úılerdiń ishine sý, elektr jelileri tartylyp, avtomobıl joldary tóseledi. Úıdi úleskerlerdiń ózderi de salýǵa bolady.
Jer úıler «Qazaqstannyń Turǵyn úı qurylys jınaq banki» arqyly satyp alynady. Bul jerde klıenttiń tólem qabileti aldymen eskeriledi.
«Jer úıdi satyp alý úshin zaemshynyń shotynda qajetti somanyń 30 paıyzy bolýy tıis.Qalǵan somany bankten arzan nesıe túrinde qaryzǵa alýyna bolady. Sondaı-aq, jalaqy az bolǵan jaǵdaıda jaqyn adamdardan kepilgerlerdi tartý jaıy da qarastyrylǵan», deıdi banktiń SQOF boıynsha dırektory Raıhan Ábdirahmanova.
Bolashaqta «Solnechnyı» shaǵyn aýdanynda barlyǵy 2094 jer ýchaskesine jeke turǵyn úı salý josparlanyp, 500 adamnan ótinish qabyldanǵan.
О́mir Esqalı, «Egemen Qazaqstan»