Túrkııanyń Shanlyýrfa provınsııasynda mektepte qarýly shabýyl bolyp, 16 adam zardap shekti. Oqıǵa Ahmet Koıýndjý atyndaǵy Anatolııa kásibı-tehnıkalyq lıseıi aýmaǵynda bolǵan. Málimetterge sáıkes, 19 jastaǵy jigit aldymen mektep aýlasynda, keıin ǵımarat ishinde uzyn uńǵyly qarýmen oq atqan, dep habarlaıdy Egemen.kz.
Atys bastalǵan sátte mektepte dúrbeleń týyp, keıbir oqýshylar terezeden sekirip qashýǵa tyrysqan. Oqý orny tez arada evakýasııalandy.
Provınsııa gýbernatory Hasan Shyldak shabýyl saldarynan 16 adamnyń jaralanǵanyn aıtty. Olardyń ishinde 4 muǵalim, 10 oqýshy, ashana qyzmetkeri jáne bir polıseı bar. Tórt adamnyń jaǵdaıy ortasha aýyr dep baǵalanýda.
AQSh-ta Aq úı mańynda atys boldy
Shabýyl jasaǵan adam buryn osy mektepte oqyǵan, biraq keıin basqa oqý ornyna aýystyrylǵany belgili boldy. Polısııa qorshaýǵa alǵan kezde, ol ustalyp qalatynyn túsinip, óz-ózine qol jumsaǵan.
Aldyn ala málimet boıynsha, shabýyldyń sebebi onyń basqa mektepke aýystyrylýyna baılanysty narazylyq bolýy múmkin. Qazirgi ýaqytta oqıǵa boıynsha tergeý júrgizilip jatyr.