Qarjy mınıstriniń orynbasary Berik Sholpanqulovtyń aıtýynsha, Senattyń jumys toptary men komıtetterinde bıýdjettiń atqarylý qorytyndylary jan-jaqty talqylandy.
Senatorlar negizgi makroekonomıkalyq kórsetkishter men bıýdjet úderisterin jetildirýge qatysty saýaldar qoıyp, usynystaryn aıtty. Mınıstrliktiń málimetterinshe, 2016 jyly bıýdjet túsimderi 100,2 paıyzǵa oryndalyp, 7 trıllıon 760 mıllıard teńgeni qurady, shyǵystar 8 trıllıon 501 mıllıard teńge, nemese 98 paıyzǵa shyqty. Bıýdjet tapshylyǵy 741 mıllıard teńgeni qurady nemese Ishki jalpy ónimniń 1,6 paıyzy boldy.
Respýblıkalyq esep komıtetiniń tóraǵasy Nurmuhambet Ábdibekov 2016 jylǵy respýblıkalyq bıýdjettiń atqarylýy jónindegi Úkimettiń esebi týraly mekemeniń qorytyndysymen tanystyrdy.
Ulttyq banki tóraǵasynyń orynbasary Alpysbaı Ahmetov 2016 jylǵy aqsha-nesıe saıasatyn iske asyrý qorytyndylary týraly depýtattardy habardar etti.
Senatorlar Rashıt Ahmetov, Sergeı Ershov, Erbolat Muqaev, Qaırat Ishanov, Serik Jaqsybekov, Bekmyrza Elamanov talqylaýǵa qatysty.
Depýtattardyń saýaldaryna qarjy mınıstri Baqyt Sultanov jáne mınıstrlikter men mekemelerdiń basqa da ókilderi jaýap berdi. Pikirtalas qorytyndysy boıynsha Úkimettiń jáne Respýblıkalyq esep komıtetiniń 2016 jylǵy respýblıkalyq bıýdjettiń atqarylýy jónindegi esepterin Palata otyrysynda qaraý týraly sheshim qabyldandy.