– Elbasy kýbogyna arnalǵan týrnırde barlyq boksshymyz jaqsy judyryqtasty. Árıne, keıbir salmaqtarda azdaǵan kemshilik, qatelikter boldy. Ony álem chempıonatyna deıin túzeıtin bolamyz. Jeke-jeke toqtalmaı-aq qoıaıyn, týrnırge qatysqan barlyq shákirtime kóńilim toldy. Berilgen tapsyrmany men kútken dárejeden asyryp oryndady deýge bolady.
– Birjan Jaqyp quramadan ketken soń 49 kılo salmaq sizdiń «bas aýrýyńyzǵa» aınalǵan sııaqty. Azııa chempıonatyna qatysqan Erjan Jomart júldege ilige almaı álem chempıonatynyń joldamasynan qaǵylsa, Prezıdent kýbogynda siz úmit artqan Ashat Júsipov fınalda fılıppındik boksshydan jeńildi. Bizde jeńil salmaq dárejesi nege aqsap tur?
– Álem chempıonatyna joldama ala almaǵanymyz, árıne, ókinishti. Degenmen, jeńil salmaqtaǵy boksshylarymyzdyń bári jas. Bolashaqtary alda. Júsipovtiń fınalǵa shyqqanyn ózim jaqsy nátıjede dep esepteımin. Kúzde ótetin el birinshiliginen úmitim kóp. Buıyrsa, Qazaqstan chempıony men júldegeri atanǵan boksshylardy sheteldegi jarystarǵa aparamyz. Halyqaralyq arenada ózin kórsetken, chempıon nemese júldeger atanǵan boksshylar kelesi álem, Azııa chempıonatyna qatysady.
– Jaqynda ǵana Halyqaralyq Olımpıada komıteti (HOK) 2020 jyly Tokıoda ótetin Jazǵy Olımpııa oıyndarynda bokstan erler arasyndaǵy eki salmaqty alyp, qyzdar boksyna beremiz degen málimdeme jasady. Buǵan ne aıtasyz?
– Bul áli naqty qabyldanǵan sheshim emes. Alda AIBA-nyń úlken jınalysy bar. Sol jıynda sheshim qabyldanýy múmkin. Jeke basym Olımpıadadan eki salmaqty alyp tastaý durys emes dep oılaımyn. Qyzdar boksyna salmaq qosa bersin, biz oǵan qarsy emespiz. Biraq, erlerden eki salmaqty kemitý boksshylarǵa aýyr tıedi. Bunyń aldynda boksta 12 salmaq bolatyn. Keıin 11 salmaq boldy. Endi mine, taǵy eki salmaqty kemitpek. Eger, osylaı sheshim shyǵyp jatsa, amal joq kónemiz. Kezinde kúres, dzıýdo sportynan da salmaq kóp bolyp, qysqartyp tastaǵan edi. Boksty da soǵan alyp kele jatqan sııaqty.
– Eki salmaqty alyp, raýnd sanyn qosyp berse qalaı bolady?
– Ol endi kásipqoı boks bolyp ketedi. Menińshe qosymsha raýnd qajet emes. Áýesqoı boksshylarǵa úsh raýnd jetkilikti.
– «Astana arlandary» WSB jobasynyń fınalynda Kýba boksshylaryna qarsy jekpe-jek ótkizetini belgili boldy. Osy oraıda, Ulttyq quramanyń boksshylary «Arlandar» sapynda óner kórsetip, klýbqa óz kómegin tıgize me?
– Ony ýaqyt kórsetedi. WSB jobasynyń fınaly ótetin mezgilde Ulttyq quramanyń jigitteri Túrkııada on kúndik saýyǵý, oqý-jattyǵý jıynyn ótkizedi. Múmkindik bolyp jatsa nege kómektespeske. Ýaqyttyń yńǵaıyna qarap kóremiz.
– Olımpıada chempıony Danııar Eleýsinov Ulttyq quramaǵa oralyp jatsa, qaı salmaqta judyryqtasýy múmkin?
– Eleýsinov áli Ulttyq quramaǵa oralǵan joq. Eger komandaǵa kelemin dep nıet bildirip jatsa, esigimiz Danııar úshin árqashan ashyq ekenin buǵan deıin aıtqanmyn. Onyń qaı salmaqta judyryqtasatynyn naqty aıta almaımyn. Biraq, óz salmaǵynda (69 kg) judyryqtasatyn shyǵar. Degenmen, munyń bárin rıng sheshedi. Kúzde bokstan Qazaqstan chempıonaty ótedi. Sol kezde bári belgili bolady. Iаǵnı, balapandy kúzde sanaıtyn bolamyz.
Áńgimelesken
Álı BITО́RE, «Egemen Qazaqstan»