Konferensııa barysynda Oljas Ábishev «Elektrondyq densaýlyq saqtaýdy damytý» respýblıkalyq ortalyǵynyń Dúnıejúzilik bank, «Qazaqtelekom» AQ jáne IýNISEF-pen birigip ázirlengen birneshe jobany tanystyrdy. Olardyń qatarynda bala kútimine jáne patronajǵa arnalǵan qosymsha da bar.
«2017 jyldyń sońyna deıin patronaj meıirbıkeleri men jas ata-analardyń kishkentaı balalarǵa kútim jasaýyna kómektesýge arnalǵan arnaıy mobıldi qosymsha iske qosylady. Osyǵan uqsas qosymshalar Ulybrıtanııa, Avstrııa, Shyǵys Eýropa elderinde paıdalanylady», dedi Oljas Əbishev. Onyń aıtýynsha, bıyl qarasha aıynda iske qosylatyn bul joba Balalar qorymen (IýNISEF) birlesip ázirlengen.
Jıyn barysynda belgili bolǵandaı, "Patronaj meıirbıkesi" mobıldi qosymshasyn paıdalaný bala týraly derekterdi toltyrý jumystaryn jeńildetedi. Iаǵnı, meıirbıkeler úı jaǵdaıynda balaǵa kóbirek kóńil bóletin bolady. «Bala eki jasqa tolǵansha ata-ana úı jaǵdaıynda balany qaratyp, meıirbıke sol jerde otyryp málimetterdi qosymshaǵa engize alady. Sondaı-aq onlaın-rejimde balanyń jaǵdaıy týraly monıtorıng jasaý múmkindigi týady», deı di bas dırektordyń mindetin atqarýshy.
Jıynda tanystyrylǵan ekinshi joba – Elektrondyq densaýlyq tólqujaty. Ony Densaýlyq saqtaý mınıstrligi Dúnıejúzilik bankpen birlesip ázirlegen.
«Emdelýshilerge arnalǵan Elektrondyq densaýlyq tólqujaty (EDT) ár adamǵa óz densaýlyǵy týraly aqparatty, dárigerlerdiń usynystary men eskertýlerin, klınıkalyq sheshimderdi kórýge múmkindik beredi», deıdi Oljas Ábishev.
Bir aıta keterligi, jobanyń dárigerlerge jáne emdelýshige arnalǵan eki nusqasy bolady. Mysaly, halyqaralyq standarttar men dárigerler etıkasyna sáıkes emdelýshige dıagnozdy belgili bir psıhologııalyq daıyndyqtan keıin habarlaıtyn jaǵdaılar bolýy múmkin. Ondaı jaǵdaıda aqparat emdelýshige dárigerler konsılıýmynan keıin 20-25 kúnnen keıin qoljetimdi bolmaq.
Densaýlyq saqtaý mınıstrliginiń «Qazaqtelekom» AQ–men birlesken jobalarynyń biri – Biryńǵaı elektrondyq poshta servısi. Ulttyq mail.kz elektrondyq servısiniń portalynda @med.mail.kz atty domen densaýlyq saqtaý salasynyń qyzmetkerlerine arnalmaq. «Atalǵan servıs barlyq medısına qyzmetkerlerine biryńǵaı aqparat almasýǵa múmkindik beredi», dedi «Elektrondyq densaýlyq saqtaýdy damytý» respýblkalyq ortalyǵynyń bas dırektorynyń mindetin atqarýshy. Bul joba bıylǵy jyldyń sońynda iske qosylyp, 2018 jyly barlyq medısına qyzmetkerlerine qoljetimdi bolady dep josparlanýda.
«Bul qyzmet arqyly medısına qyzmetkeleri Qazaqstan boıynsha kez kelgen áriptesine poshtamen hat jibere alady. Qazir olardyń sany respýblıka boıynsha 220 myńnan asty. Sonymen qatar Densaýlyq saqtaý mınıstrligi de osy qyzmet arqyly qyzmetkerlerge tikeleı hat joldaý múmkindigin alady», deıdi Oljas Ábishev. Onyń aıtýynsha, Densaýlyq saqtaý mınıstri Qazaqstan boıynsha barlyq densaýlyq saqtaý mamandaryna quttyqtaý hatyn joldap kórgen.
«Qazaqtelekom» AQ Aqparattyq júıeler dıreksııasynyń basshysy Janar Murzahanovanyń aıtýynsha, bul joba domeni Qazaqstanda bolǵandyqtan, aqparat almasý jyldamdyǵy óte joǵary bolady.
«Medısına salasy málimetterdi saqtaýdyń jáne almasýdyń joǵary qýattylyǵyn talap etedi. Atalǵan joba qyzmetkerlerdiń usynystary boıynsha jańartylyp otyratyn bolady», deı kele Janar Murzahanova Densaýlyq saqtaý mınıstrligimen birlesip taǵy birneshe joba qolǵa alynǵanyn atap ótti.
«Qazaqtelekom»AQ Mınıstrlikpen birlesip dárigerlerge elektrondyq túrde jazylý, dárigerler men emhanalar reıtıngi sekildi jobalardy qarastyrýda. Sonymen qatar emhanalardyń býhgalterlik esep jobasyn erekshe atap ótýge bolady. Ol bıýdjettik prosesterdiń aıqyndyǵyn qamtamasyz etý jáne medısınalyq uıymdar qyzmetiniń qarjylyq-sharýashylyq qyzmetin esepke alýdy qamtamasyz etý maqsatynda mınıstrlikpen birlesip júzege asyrylýda», dedi Janar Murzahanova.
Bul jobanyń basty ereksheligi – Densaýlyq saqtaý mınıstrligi emhanalardyń bıýdjetti ıgerýin baqylap, tipti, kassalardaǵy qyzmetter týraly da málimet alyp otyratyn bolady
Esterińizge sala ketsek, «Elektrondyq densaýlyq saqtaýdy damytý» respýblkalyq ortalyǵy - Qazaqstan boıynsha densaýlyq saqtaý salasyn aqparattandyrýǵa jáne aqparattyq júıelerdi damytýǵa jaýap beretin Densaýlyq saqtaý mınıstrliginiń qurylymdyq bólimi.
Gúlnur Qýanyshbekqyzy,
«Egemen Qazaqstan»