Aıta ketken lázim, kórme bıletteri zııatkerlik mektepterdiń oqýshylary uıymdastyrǵan qaıyrymdylyq jármeńkelerinen túsken qarjyǵa alynǵan bolatyn. Osy shara arqyly turmysy tómen otbasylardyń balalary jazǵy demalystaryn EKSPO qabyrǵasynda umytylmastaı ótkizbek.
Atalǵan sharaǵa, sonymen birge, «Halyq» qaıyrymdylyq qory demeýshi bolyp otyr. Saltanatty jıynda «Nazarbaev zııatkerdik mektepteri» DBBU basqarma tóraıymy Kúlásh Shámshıdınova men Halyq banki Astana qalalyq fılıalynyń dırektory Janar Rahymova EKSPO-nyń jas elshilerin quttyqtady.
Kúlásh Noǵataıqyzynyń aıtýynsha, Qazaqstannyń «Nur Álem» bas ekspozısııasynda, Qytaı, Germanııa, Ońtústik Koreıa, Reseı jáne basqa da elderdiń pavılondarynda usynylǵan bolashaq energııasy EKSPO-nyń jas elshilerine jańa álem qýatynyń beınesin kórsetetin bolady. Sonymen birge, balalardyń «Báıterek», «Astana-Opera», «Dýman» okeanarıýmy, «Atameken» etnomemorıaldyq kesheni sııaqty elordanyń kórikti oryndaryna saıahaty, «Nurly jol» jelekjolymen serýendeý jáne Esil ózeninde qaıyqpen júzý josparlanyp otyr.
Halyq bankinde oqýshylar teńgeniń jáne qarjy naryǵynyń paıda bolý tarıhymen tanyspaq. Sondaı-aq, sporttyq oıyndar, ǵylymı jáne shyǵarmashylyq jobalardy ázirleý qarastyrylǵan. Oqýshylar bos ýaqytta zııatkerlik mektepter úshin dástúrli sabaqqa aınalǵan qysh qolóneri, áýe kóligin modeldeý, óner dızaıny jáne dramalyq ónerge mashyqtanýmen shuǵyldanady. Atalǵan sharada EKSPO kórmesiniń alǵashqy tartýy, ıaǵnı jańa oqý jylyna arnalǵan oqý quraldary salynǵan sómkege Semeı óńirinen kelgen jazǵy mekteptiń eń jas qatysýshysy Tańsheber Amantaı ıe boldy.
Dýman ANASh, «Egemen Qazaqstan»
Sýretti túsirgen
Igor BÝRGANDINOV