Biz barymyzdy baǵalap, jetken jetistigimizge shynaıy qýana bilýimiz kerek. Ásirese, el Táýelsizdiginiń jıyrma alty jylǵa jeter-jetpes kezeńindegi Qazaqstannyń aıdaı álemge tanylýy jáne sol álemdi óziniń áleýmettik-ekonomıkalyq, odan qaldy saıasattaǵy izgi qadamdarymen súısindirip otyrǵandyǵy, eń bastysy bizdiń halqymyzdyń mártebesi.
Elbasy el Táýelsizdiginiń shırek ǵasyryna jeter-jetpes kezeńderde qazaq elin bir ǵasyrdyń enshisine de syıa qoımastaı tarıhı joldan alyp ótti. Qazaq eli dúnıeniń tórt buryshyna eń áýeli Nazarbaev esimimen, Nazarbaev kelbetimen tanyldy. Nazarbaev qazaq eli úshin Álemge, Ǵaryshqa, Bolashaqqa jol ashyp berdi! Bizdi Qazaqstannyń Tuńǵysh Prezıdenti, Elbasy Nursultan Nazarbaev mártebeli bıikke kótere bildi.
Elbasynyń batyl da kóregen saıasatynyń arqasynda Astana qalasy salyndy. HH-shy ǵasyrdyń sońǵy on jyldyǵynyń dúnıesi ózgerip, saıası júıesi áli qalyptasyp bolmaı jatqan óliara tusta Qazaqstan sııaqty alyp eldiń jańa Astanasyn jańa orynǵa kóshirip alyp kelip, salǵyzýdyń ózi Nursultan Ábishulynyń erlikpen para-par tipti, kózsiz batyrlyǵy deıikshi. Jelmaıamen jelip júrip jer uıyǵyn izdegen Asanqaıǵy babasyndaı táýelsiz eli úshin endigi jer uıyǵyn izdegen Nursultan Nazarbaev Esildiń boıyna el qondyryp, alǵashqy qazyǵynan bastap ózi qaǵyp, búgingi aıdyndy da aıbyndy Aqordaly Astanany dúnıe ákelgendigi bizdiń, ıaǵnı qazaq eliniń máńgilik el bola alatyndyǵyn dáleldep, osyǵan eń áýeli óz jurtynyń da, odan qaldy dúnıe jurtynyń da kózderin jetkizip, ılandyra bilgen ulylyǵy edi!
Astana – qasıetti qazaq jerine júregine syıǵan tutas álemdi óz eli men halqyna degen sheksiz súıispenshiliginiń belgisindeı etip óz dalasyna qondyryp, ornyqtyra bilgen Nursultan Nazarbaevtyń ózindik bir álemi! Astana- eltáýelsizdiginiń lúp-lúp soǵyp turǵan júregi emes pe?! Astana- dóńgelengen dúnıeniń qazaq ıelenip otyrǵan qasıetti qazaq jerine ornatylǵan álemniń tórt buryshynan da kózge túsip, kóriner, altyn tuǵyrly eń zańǵar da, eń bıik, eń abzal da, eń bir azbaıtyn da, tozbaıtyn máńgiliginiń máńgiligi jolynda myń ólip, myń tirilgen qazaq úshin soǵylǵan uly Eskertkish!
Endi, mine sol Astana qalasyndaǵy halyqaralyq áýejaıǵa Nursultan Nazarbaevtyń esiminiń berilýi Elbasynyń táýelsiz el bolýymyzǵa sińirip kele jatqan ólsheýsiz eńbeginiń baǵasy dep bilemin. О́te durys, óte jón sheshim jasaldy. Bul kúnderi Qazaqstan Prezıdentiniń esimi men adamzat múddesi úshin jasap kele jatqan izgi amaldaryn búkil álem halqy jaqsy biledi. Álem súısinedi! Endeshe sol álem súısinip otyrǵan Nursultan Nazarbaevtaı óz perzentin qurmettep, áýeletip jatqandyǵymyz da bizdiń eldigimiz dep sanaımyn. Qutty bolsyn!