Osynaý shırek ǵasyr muǵdarynda Shyǵys Qazaqstannyń tártip saqshylary izdeýde júrgen 13 myńnan astam qylmyskerdi quryqtap, iz-tússiz ketken 20 myńǵa jýyq adamnyń qaıda júrgenin anyqtapty. О́ńirdiń ishki ister organdarynyń 38 qyzmetkeri qyzmettik boryshyn óteý barysynda qaza tapqan. Toǵyz polıseı beıbit kúnde batyrlyqtyń eren úlgisin kórsetip, onyń 5-eýi «Erligi úshin» medalimen marapattalǵan. Aımaqtyń tergeýshileri sońǵy tórt jylda elimiz boıynsha birinshi orynda keledi eken. Rıdder qalasynyń ishki ister bóliminiń tergeýshisi, polısııa leıtenanty Ashat Ahmetov «2016 jyldyń eń úzdik tergeýshisi» dep tanylypty.
Elbasynyń Ult jospary – «100 naqty qadam» baǵdarlamasy aıasynda 2015 jyly jergilikti polısııa qyzmeti qurylǵany belgili. О́ńirdiń quqyq qorǵaý salasynyń materıaldyq-tehnıkalyq bazasyn nyǵaıtý maqsatynda oblystyq bıýdjetten 2016 jyly 5, bıyl 6 mıllıard teńgeden astam qarjy bólinipti.
«Tártip saqshylaryn zamanaýı tehnıkalarmen, qyzmettik páterlermen qamtamasyz etýge erekshe kóńil bólinip jatyr. О́tken jyly jergilikti polısııaǵa 107 avtokólik pen 5 avtobýs berildi, bıyl 101 avtobýs pen 140 avtokólik berýdi josparlap otyrmyz. Osynyń nátıjesinde ishki ister qyzmetkerleriniń jumys tıimdiligi artty. Buǵan bıyl aımaqtaǵy qoǵamdyq oryndardaǵy qylmys sanynyń 18, kóshedegi qylmys sanynyń 12, kámeletke tolmaǵandardyń qatysýymen oryn alatyn qylmys sanynyń 10, otbasylyq qarym-qatynastaǵy qylmystyń 48 paıyzǵa jáne jol kólik oqıǵasynyń 14 paıyzǵa tómendeýi dálel», – dedi oblys ákimi Danıal Ahmetov saltanatty jıynda sóılegen sózinde.
О́ńir basshysy aımaqtyń polıseılerin tól merekelerimen quttyqtaǵannan keıin birneshe tártip saqshysyn Shyǵys Qazaqstan oblysynyń Qurmet gramotasymen marapattady.
Azamat Qasym, «Egemen Qazaqstan» Foto: Esimhan Orynbaev.