Kitap avtory, Reseı Federasııasynyń eńbek sińirgen mádenıet qaıratkeri, tarıhshy, jazýshy, pýblısıst Nıkolaı Zenkovıch tusaýkeser barysynda kitapty shyǵarý ıdeıasy men Elbasynyń ómirindegi sıýjettik jelige arqaý bolǵan negizgi oqıǵalar týraly baıandady.
Tanymal tulǵalar týraly jazylǵan 60-tan astam kitaptyń avtory Nıkolaı Aleksandrovıch óz tizimine Nursultan Nazarbaevtyń alǵashqy bolyp engenin aıtty. «Men bul kitapty 1986 jylǵy Jeltoqsan oqıǵasynan keıin jaza bastadym. Sodan beri Nursultan Nazarbaev týraly oǵash pikir aıtylǵanyn estigen emespin. Qoǵamdyq pikir degen osy. Nursultan Nazarbaev týraly qoǵam oıynyń ózgergenin de kórmedim. Ol halqynyń, al halqy Memleket basshysynyń qadirin biledi. Bul kitap 12 jastan asqan oqyrmandarǵa arnalǵan. Basty ıdeıasy – qol qýsyryp otyrsań, eshqashan uly tulǵa bola almaısyń», deıdi avtor. Qalamgerdiń aıtýynsha, kitapta sýrettelgen Elbasynyń jalyndy ómiri oqyrmandy ózine eriksiz baýrap alady.
«Nursultan Nazarbaev tarıh úshin mańyzdy oqıǵalardyń basy-qasynda júrip qana qoımaı, qıyn kezderi jaǵdaıdy óz qolyna ala bildi. Bul úshin erlik, bilim jáne tájirıbe kerek. Eń bastysy – Otan úshin eńbektený. Prezıdenttiń ómiri Otanymen, halqymen birge órbidi. Sonyń arqasynda ony tek Qazaqstanda emes, shetelde de erekshe baǵalaıdy», deı kele, kitap avtory jastar N.Nazarbaevqa uqsasa degen tilegin aıtty.
Kitaptyń orys tilindegi nusqasy 2 myń dana, qazaq tilindegi aýdarmasy da 2 myń danamen shyqty. Reseılik jazýshynyń kitabyn qazaq tiline belgili qazaqstandyq jýrnalıst, qalamger, TMD jýrnalıster konfederasııasy syılyǵynyń laýreaty, Qazaqstannyń eńbek sińirgen qaıratkeri Qaınar Oljaı aýdarǵan.
«Elbasynyń saıası tulǵa retindegi eńbekteri kóp dúnıege arqaý boldy. Biraq onyń jastyq shaǵy týraly fılmnen basqa eshteńe joq. Toqsanynshy jyldardyń basynda Beıbit Saparalynyń Prezıdenttiń balalyq shaǵy týraly kitaby shyqqan bolatyn. Biraq joǵary synyp oqýshylaryna, stýdentterge arnalǵan kitap joq edi. Osy kitap sol bos orynǵa kirpish bolyp qalandy», deı kele, Qaınar Oljaı kitaptyń stılin Berdibek Soqpaqbaevtyń «Meniń atym Qoja» shyǵarmasyna uqsatty.
Aýdarmashynyń aıtýynsha, kitapta tarıhı derekter kóptep qamtylǵan. Mysaly, Nazarbaevtyń Qazaqstan munaıyn qalaı ıgeremiz degen máselemen «Shevronǵa» baryp, eki apta boıy tájirıbeden ótkenin bireý bilse, bireý bilmeıdi. Sonymen qatar, kitapta biz bilmeıtin derekter de paıdalanylǵan.
Jıynda sóz sóılegen «Nazarbaev zııatkerlik mektepteri» DBBU Basqarma tóraıymy Kúlásh Shámshıdınova kitap tiliniń jatyqtyǵyn erekshe atap ótti. «Kitaptyń oqýshylar men jastarǵa qajetti dúnıe ekeni kórinip tur. Munda ulttyq tárbıe alǵan, saltymyzdan sýsyndaǵan balanyń Elbasy bolǵanǵa deıingi ósý joly qunarly tilmen jetkizilgen. Bul jastar úshin, ustazdar úshin de paıdaly bolmaq. Nazarbaev zııatkerlik mektepteri oqý prosesinde ony mindetti túrde paıdalanatyn bolady», dedi ol.
Kitap eki bólimnen turady. «Úshqońyrdan shyqqan ulan» atty birinshi bólimi Prezıdenttiń balalyq shaǵyn, jastyq jyldaryn sóz etedi. "Mártebeli Prezıdent" atalatyn ekinshi bólimi onyń álemge tanymal tulǵalar qataryna qalaı qosylǵany týraly syr shertedi.
Gúlnur QÝANYShBEKQYZY, Foto: Orynbaı BALMURAT, «Egemen Qazaqstan»