Is-sharaǵa Parlament depýtattary, Úkimet músheleri, memlekettik organdardyń, dıplomatııalyq korpýstyń, zııaly qaýymnyń, isker toptardyń jáne mádenıet salasynyń ókilderi qatysty. Memleket basshysy barsha jurtty Astana kúnimen quttyqtap, 19 jyl ishinde elimizdiń bas qalasy joǵary qarqynmen damyǵanyn atap ótti.
– Astana – ǵajap qala. Keshe keshke qaraı qalany aralap shyqtym. Keshki mezgilge qaramastan, kóshede qydyryp júrgen kóptegen adamdy kórdim. Bul kóp nárseni ańǵartady. Adamdardyń kóńil-kúıi jaqsy, ózderin qaýipsiz sezinedi. Sonaý erte zamanda «Qala qabyrǵasymen emes, adamdarymen kórikti» degen sóz aıtylǵan, – dedi Qazaqstan Prezıdenti.
Nursultan Nazarbaev Astananyń búgingi damý yrǵaǵy búkil elimizdiń jańarýyna serpin beretinin aıtty.
– Biz ekonomıkada, saıasatta jáne mádenıette aýqymdy jańǵyrýdy iske asyryp kelemiz. Sol jumystyń nátıjesi elimizdi damytýǵa arnalǵan. Damýymyzdyń basynda árdaıym Astana turady. Biz munda túrli máseleni, sonyń ishinde álemniń ár túkpirinde beıbitshilik ornatý máselesin de sheship kelemiz. Bizdiń beıbit, tatý kórshilik jáne ınvestısııa tartý jónindegi saıasatymyz Qazaqstannyń árbir azamaty úshin qolaıly jaǵdaı jasaýǵa baǵyttalǵan, – dedi Elbasy.
Sondaı-aq, Qazaqstan Prezıdenti «EKSPO-2017» halyqaralyq kórmesin ótkizýdiń mańyzdylyǵyn jáne onyń qalamyz ben elimizdi odan ári damytýdaǵy rólin atap ótti. – Qazir Qazaqstan «EKSPO-2017» kórmesiniń arqasynda halyqaralyq qoǵamdastyqtyń nazaryn ózine aýdaryp otyr. Qonaqtarymyz Astanaǵa tamsana qaraıdy. Biz – ǵasyrlar toǵysynda jańa megapolıs salǵan birden-bir memleketpiz. Búginde Astana jylyna el bıýdjetine trıllıon teńge quıyp keledi. Bul oraıda, barlyq kiristiń 65 paıyzy shaǵyn jáne orta bıznesten túsip otyr. Bárimiz bas qalamyzdyń boı kóterýine kýá boldyq, – dedi Nursultan Nazarbaev.
Sońynda Elbasy barsha qazaqstandyqtardy elorda kúnimen taǵy da quttyqtap, baq-bereke jáne jańa tabystarǵa jetýge tilektestik bildirdi, sondaı-aq Astanany salýǵa atsalysqan azamattarǵa alǵys aıtty.