Qalanyń naǵyz sportshy jáne belsendi turǵyndary Astana kúnine arnalǵan dástúrli velojarysqa qatysyp, QR Tuńǵysh prezıdenti saıabaǵynan bastap Abaı atyndaǵy jelekjoldyń gúl baǵynda «Nur otan» partııasynyń oblystyq bólimshesi ǵımaratynyń aldyndaǵy alańǵa deıin jarysty. Sol jerde Astana kúnin merekeleýdiń Aqtóbedegi resmı ashylýy ótti. Qalanyń shyǵarmashylyq ujymy tamasha konserttik baǵdarlama usynyp, qala turǵyndary men qonaqtaryna tamasha kóńil-kúı syılady.
Saltanatty sharaǵa oblys ákimi Berdibek Saparbaev qatysty. О́ńir basshysy merekege jınalǵandarmen birge Túrgenev kóshesinen Eset batyr kóshesine deıingi Abaı atyndaǵy jańartylǵan gúl baǵyn qarap shyqty. Qaıta jańartýdyń arqasynda gúl baǵy jaı ǵana qydyrý aımaǵy emes, belsendi demalys aımaǵyna aınaldy: eki balalar alańy, jattyǵý quraldary bar sport alańy men vorkaýtpen aınalysý alańy salyndy, sonymen qatar 230 qylqandy jáne japyraqty aǵashtar otyrǵyzyldy. Jańartylǵan jelekjolda qalanyń porfıýmerlik jáne qysh buıymdaryn jasaý mektepteri ónimderiniń, qoldanbaly óner sheberleri buıymdarynyń kórme-jármeńkesi ótip, túrli oıyndar, vıktorıalar men konkýrstar uıymdastyryldy.
ROBOTIH KAZAKHSTAN kompanııasynyń robottardy kórsetý jáne robottardy qurastyrý men basqarý boıynsha sheberlik sabaqtary erekshe qyzyǵýshylyq týǵyzdy. Astana kúnine arnalǵan merekelik baǵdarlamalar men mádenı-kópshilik sharalary bir mezette saıabaq, gúl baǵy syndy qalanyń basqa alańdarynda jáne oblys aýdandarynda qyzyqty ári tolyqqandy ótti.
Temir Qusaıyn,
"Egemen Qazaqstan"
Aqtóbe