Kúres Taıland astanasy Bangkokta kúres túrlerinen kadetter arasynda Azııa chempıonaty aıaqtaldy. Qazaqstandyq erkin kúres balýandary bir altyn, eki kúmis jáne úsh qola medal ıelendi. 69 kıloda Meırambek Súleımenov Azııa chempıony atansa, 46 kıloda beldesken Elaman Qadyrseıit pen Aqbar Qurbanov (50 kg) kúmis medal ıelendi. Dáýlet Temirjanov (54 kılo), Dáýlet Tájibaı (58 kılo), Savet Abylaı (85 kılo) Azııa chempıonatynyń qola júldegeri atandy. Al qyzdar kúresinen Maral Táńirbergenova (38 kg), Aıajan Marqasheva (43 kg) jáne Albına Qaıyrgeldınova (63 kg) kúmis medal ıelense, 40 kıloda el namysyn qorǵaǵan Aıdana Sultanova qola júldeni qanaǵat tutty. Grek-rım kúresiniń jas balýandary úsh altyn, bir kúmis medal jeńip aldy. Erkebulan Ardaqov (46 kg), Rahat Saǵymbaı (63 kılo) men Dáýlet Jalǵasov (76 kg) óz salmaqtarynda Azııanyń teńdessiz sportshysy atansa, 42 kılo salmaqta kúresken Erasyl Mamyrbekov kúmis medalǵa ıe boldy.
Tennıs Astanadaǵy «Dáýlet» ulttyq tennıs ortalyǵynda tennısten Qazaqstan Respýblıkasy Prezıdenti kýbogy aıaqtaldy. Halyqaralyq týrnırge bıyl alys-jaqyn sheteldiń 21 elinen kelgen 200-den asa álemniń úzdik tennısshileri baǵyn synady. Týrnırdiń erler arasyndaǵy fınaldyq básekege otandasymyz Mıhaıl Kýkýshkın men belorýssııalyq tennısshi Egor Gerasımov shyqqan bolatyn. Úsh setke sozylǵan oıynda Egor Gerasımov 7:6 (11:9), 4:6, 6:4 esebimen jeńiske jetip, «Prezıdent kýbogy-2017» jarysynyń jeńimpazy atandy. Aıta keteıik, týrnırdiń fınalyna shyqqany úshin Kýkýshkın ATR reıtınginde 16 saty joǵarylap, 102-orynǵa turaqtady.
Velosport Velosporttan «Týr de Frans-2017» velokópkúndiginiń bıylǵy jarysy óz máresine jetti. Fransııa tasjoldarynda ótken jyldyń iri týrnırinde Sky komandasynyń brıtanııalyq sportshysy Krıs Frým jeńimpaz atandy. Ol qatarynan úshinshi, al jalpy tórtinshi ret (2013, 2015, 2016, 2017) jeńiske jetip otyr. Al «Astana» velokomandasynyń kapıtany Fabıo Arý týrnırdi besinshi orynmen aıaqtady. Qazaqstan velosport federasııasynyń prezıdenti Darhan Qaletaev «Astananyń» bıylǵy nátıjesine kóńili tolatynyn jetkizdi.
Álı BITО́RE, «Egemen Qazaqstan»