Abaı aýdanynyń irge tasyn qalaǵan, Shákárim qajynyń kózin kórgen Kenjetileý Dolanbekulynyń balasy Aıdar Kenjetileýuly Abaıdyń ekinshi áıeli Áıgerimniń Bátet Ázimhanqyzyna syılaǵan qobdıshasyn mýzeı qoryna tapsyrdy. Bul syılyqtyń ıesi Bátet apamyz – rýy Jigitek, Bójeı urpaǵy eken.
A.Kenjetileýulynyń aıtýy boıynsha, Bátet Ázimhanqyzy Yrǵyzbaı aýylyna kelin bolyp túsedi. Burynǵynyń salty boıynsha, aǵaıyn-týys kezektesip, esik kórsetý úshin jas kelindi qonaqqa shaqyryp otyrǵan. Sonda Áıgerim kelin bolyp túsken Bátetti óz úıinen dám tattyryp, sońynda osy qobdıshany syıǵa tartqan. Onysy – «qýys úıden qur shyqpasyn», ıgilikke bastaǵan yrym bolsyn degeni.
A.Kenjetileýulynyń anasy Aqlııa – Bátet Ázimhanqyzynyń týǵan sińilisi. 1967 jyly Bátet apamyz qobdıshany A.Kenjetileýulynyń áıeli Baqytqa bergen. Mine, osylaısha, A.Kenjetileýuly Áıgerim syıǵa tartqan qobdıshany endi mýzeı qoryna tapsyrdy.
Kóneniń kózi bolǵan qobdısha mýzeı qorynda saqtalyp, jýyq arada jurt nazaryna usynylady.