Almaty qalasynda respýblıkalyq «Mıgrant» jedel-profılaktıkalyq is-sharasynyń qorytyndysy shyqty. 4 kúnge sozylǵan keshendi shara barysynda polısııa qyzmetkerleri kóshi-qon zańnamasy salasyndaǵy quqyq buzýshylyqtardy anyqtaý jáne aldyn alý baǵytynda aýqymdy tekserýler júrgizdi, dep jazady Egemen.kz.
Nátıjesinde, 1 040 adam ákimshilik jaýapkershilikke tartylyp, onyń ishinde 132 shetel azamaty el aýmaǵynan shyǵaryldy. Anyqtalǵan quqyq buzýshylyqtardyń basym bóligi sheteldikterdiń elde bolý tártibin buzýy boldy, osy sanatta 811 sheteldik jaýapqa tartyldy. Sonymen qatar, 198 qabyldaýshy tulǵaǵa shetel azamattarynyń zańdy túrde bolýyn qamtamasyz etpegeni úshin ákimshilik shara qoldanyldy. 31 jumys berýshige sheteldik jumys kúshin tartý qaǵıdalaryn buzǵany úshin tıisti sheshimder qabyldandy.
Is-shara barysynda zańsyz kóshi-qon arnasyn uıymdastyrý deregi áshkerelenip, atalǵan fakt boıynsha sotqa deıingi tergep-tekserý bastaldy. Budan bólek, memleketaralyq izdeýde júrgen 2 shetel azamaty ustaldy.
7 myńnan astam sheteldik kóshi-qon zańnamasyn buzǵan
Almaty qalasy kóshi-qon qyzmeti basqarmasynyń bastyǵy Erkin Amantaevtyń aıtýynsha, mundaı is-sharalar kóshi-qon salasyndaǵy tártipti júıeleýge jáne zań buzýshylyqtardyń aldyn alýǵa baǵyttalǵan.
«Negizgi maqsat – tek quqyq buzýshylyqtardy anyqtaý ǵana emes, olardyń aldyn alý. Biz barlyq qatysýshylardyń jaýapkershiligin nazarda ustaımyz: shetel azamattary da, olardy qabyldaýshy tulǵalar men jumys berýshiler de zań talaptaryn saqtaýǵa mindetti. Zań – barshaǵa ortaq», dedi polısııa qyzmetkeri.
Almaty qalasynyń polısııasy qoǵamdyq tártipti saqtaý, zańdylyqty qamtamasyz etý jáne kóshi-qon zańnamasynyń saqtalýyn baqylaý baǵytyndaǵy jumystaryn aldaǵy ýaqytta da júıeli túrde jalǵastyrady.
Dýbaıdaǵy dron shabýylyn vıdeoǵa túsirgen sheteldikter ustaldy