Memleket basshysy Qasym-Jomart Toqaevtyń tapsyrmasy aıasynda Abaı oblysyndaǵy ınfraqurylymdy jańǵyrtý úshin Úkimet rezervinen qomaqty qarajat bólindi. Tıisti qaýlyǵa Premer-mınıstr Oljas Bektenov qol qoıdy, dep habarlaıdy Egemen.kz.
Qarajat aldaǵy jylytý maýsymynyń turaqty ótýin qamtamasyz etý úshin Semeı qalasyndaǵy jylýmen qamtý nysandaryn jóndeýge baǵyttalady.
«Semeı qalasynda 340 myńǵa jýyq halyq turady. Ortalyqtandyrylǵan jylýmen jabdyqtaý júıesi 70 myńnan astam tutynýshyny, sonyń ishinde kópqabatty jáne jeke turǵyn úılerdi, sondaı-aq áleýmettik ınfraqurylym nysandaryn jylýmen qamtamasyz etedi. Qaladaǵy syrtqy jylý jelileriniń jalpy uzyndyǵy – 325,5 shaqyrym. Jelilerdiń tozý deńgeıi 58,2% nemese 189 shaqyrym, bul ınfraqurylymdy kezeń-kezeńimen jóndeý jáne jańǵyrtý jumystaryn jalǵastyrý qajet ekenin kórsetedi», dep habarlady Úkimettiń baspasóz qyzmeti.
Keıingi jyldary qalada 54 shaqyrym jylý jelililerin aýystyrý, kúrdeli jóndeý, rekonstrýksııalaý jumystary júrgizildi. Nátıjesinde tozý deńgeıi 75%-dan 58%-ǵa deıin tómendedi.
Energııa júıesi qysqa tótep berdi: Úkimet stansııalardy jóndeýge jáne jańǵyrtýǵa 384 mlrd teńge baǵyttaıdy
2025-2026 jyldardaǵy jylytý maýsymyna daıyndyq aıasynda Semeı qalasyndaǵy jylýmen qamtý nysandarynda birinshi kezektegi jóndeý jumystary júrgizildi. Bul rette qajetti qarjylandyrýdyń 70%-y Úkimet rezervi esebinen qamtamasyz etildi.
Bólingen qarjy 2026-2027 jyldardaǵy jylytý maýsymyna daıyndyq sheńberinde jylý jelileriniń eń mańyzdy ýchaskelerin jańartýdy jalǵastyrýǵa múmkindik beredi. Sonymen qatar bul Semeıdegi jylýmen jabdyqtaý júıesiniń senimdiligin arttyryp, qysqy júkteme kezinde júıeniń turaqty jumys isteýin qamtamasyz etedi.