«Resmı statıstıka boıynsha, jumyssyz halyqtyń 25 paıyzy orta mekteptik bilimi ǵana bar adamdar. О́z betinshe jumyspen qamtylǵandar arasynda jartysy, atap aıtqanda 49 paıyzy arnaıy bilimi nemese kásibı daǵdysy joq azamattar. Sondyqtan da oqytý sharalary birinshi kezekte Ulttyq biryńǵaı testileýden ótpeı, ıaǵnı oqý oryndaryna túspeı qalǵan mektep túlekterine qatysty bolady. Búginge 21 myńǵa jýyq osyndaı balalardy 1 qyrkúıekten qabyldaýǵa 321 tehnıkalyq jáne kásiptik bilim berý uıymy daıyn. Baǵdarlama esebinen shákirtaqysy, bir mezgildik ystyq tamaǵy, sondaı-aq syrttan kelgenderge jol shyǵyndary men turǵyn úı jaldaý shyǵyndaryn óteýge materıaldyq kómek beriledi»,-dep toqtaldy vıse-mınıstr.
Onyń sózine qaraǵanda, oqytýdyń ekinshi túri qysqa merzimdi kásiptik oqýǵa sáýir aıynan bastap 28 myń jumyssyz adam qatysýda. Bul jerde «Atameken» ulttyq kásipkerlik palatasymen birlese otyryp, osy qysqa merzimdik oqýdy shilde aıynan bastap basym túrde kásiporyndardyń janyndaǵy oqý ortalyqtary arqyly uıymdastyrý bastaldy. Sebebi mundaı ustanym bilim berý sapasymen qatar, olardyń odan ary qaraı jumysqa ornalasý múmkindigin arttyratyn kórinedi. Ol úshin kásipkerler palatasymen tıisti memorandýmǵa qol qoıylyp, baǵdarlamaǵa qajetti túzetýler engizilip, jumys berýshilerdiń janynan ázirshe 39 oqý ortalyqtarynyń tizbesi aıqyndaldy. Bul tizbe tolyǵady. Sonymen, jyl sońyna deıin qysqa merzimdi kásiptik oqýmen 70 myńnan astam adamdy qamtý eskerilgen.
«О́ńirler bólinisinde oqytý qarqyny ár túrli. Mysaly, Almaty qalasynda qysqa merzimdik kýrstarmen josparlanǵan kórsetkishtiń 10 paıyzy ǵana, Aqtóbe oblysynda 18 paıyzy, Soltústik Qazaqstan men Aqmola oblystarynda 25 paıyzǵa jýyǵy ǵana qamtylǵan»,-dep túıindedi sózin Nurymbetov.