Memleket basshysy Nursultan Nazarbaev Dorıs Loıthardqa «EKSPO-2017» halyqaralyq kórmesindegi Shveısarııa ulttyq kúniniń ashylýyna qatysqany úshin rızashylyq bildirdi.
– Sizdiń alǵash ret jańa elordamyzǵa kelip otyrǵanyńyzǵa qýanyshtymyn. Jaqynda, 1 tamyzda Shveısarııanyń ulttyq merekesi – Konfederasııanyń qurylǵan kúni atap ótildi. Meıramdaryńyzben quttyqtaımyn. Búgin EKSPO kórmesinde ulttyq kúnderińizdi ashtyńyz. Sizge unady degen úmittemin. Biz úshin EKSPO kórmesine kelýińizdiń mańyzy zor, – dedi Qazaqstan Prezıdenti.
Nursultan Nazarbaev eki el arasynda qalyptasqan yntymaqtastyqqa toqtalyp, ekijaqty ekonomıkalyq jáne saıası qarym-qatynastardyń odan ári nyǵaıa túsetinine senim bildirdi.
– Shveısarııa – Qazaqstannyń Eýropadaǵy asa mańyzdy seriktesi. Biz bul qarym-qatynasty joǵary baǵalaımyz jáne ony ári qaraı damytýǵa nıettimiz. Elderimiz arasyndaǵy taýar aınalymy artyp keledi. Shveısarııa bıznesiniń elimizde damýyna múddelimiz. Qazir 300 kásiporyn jumys isteýde, olardyń sany odan da kóp bolýy múmkin. Sizdiń saparyńyz ekonomıkalyq jáne saıası qarym-qatynasymyzdyń odan ári nyǵaıýyna serpin beredi dep senemin, – dedi Qazaqstan Prezıdenti.
Memleket basshysy Shveısarııa Konfederasııasynyń Prezıdentine Qazaqstanǵa jasaǵan sapary barysynda aralap kórýge bolatyn Astana qalasyndaǵy sáýletti ǵımarattar týraly aıtty.
– Sońǵy on bes jylda salynǵan qalaǵa alǵashqy saparyńyz qyzyqty bolǵan shyǵar dep oılaımyn. Biz EKSPO nysandaryn 3 jylda salyp shyqtyq. Astanada álemde teńdesi joq kóptegen biregeı jobalar júzege asyryldy. Máselen, munda sáýletshi Norman Fosterdiń jobasy boıynsha tańǵajaıyp pıramıda salyndy, – dedi Nursultan Nazarbaev.
Sonymen birge, Memleket basshysy «Nur Álem» sferasyn, «Han Shatyr» saýda jáne oıyn-saýyq ortalyǵynyń ǵımaratyn, «Nurly Jol» jańa vokzalyn, «Astana Opera» opera jáne balet teatryn, sondaı-aq basqa da nysandardy atap ótti.
Kezdesýde Dorıs Loıthard Qazaqstan Prezıdentine alǵys bildirip, «EKSPO-2017» kórmesiniń tabysty uıymdastyrylýmen quttyqtady.
– Shyn máninde, «Nur Álem» sferasy – tańǵalarlyq nysan. Onda ornalasatyn «Astana» qarjy ortalyǵynyń damý perspektıvasy óte jaqsy bolady dep oılaımyn. Sonymen qatar, bıznes tarapynan qarym-qatynasty nyǵaıtýǵa zor qyzyǵýshylyq bar ekenin aıtýǵa bolady, – dedi Shveısarııa Konfederasııasynyń Prezıdenti.