Naýqasqa baǵdarlanǵan mobıldik resýrsty jasaý ıdeıasy Kardıologııalyq ortalyqtyń rentgen-hırýrgy Dmıtrıı Tıoǵa tıesili.
Ol kardıologııadan bólek, úsh jyl qatarynan asqazan qaterli isiginiń skrınıngimen aınalysyp keledi. Dáriger osy jyldar ishinde adamdar qaterli isik skrınınginen úreılenetinin jáne olardyń onkosyrqattar jaıly habary azdyǵyna kózi jetken.
«Skrınıngilik toptarǵa jatatyndar arasynda túsinispeýshilik kezdesedi, keıde olar tekserýden ótýge úzildi-kesildi bas tartady. Shetelde mundaı joq. Onda saqtandyrý medısınasy óte qymbat jáne adamdar der ýaqytynda tekserilý asqynǵan jaǵdaılardy emdeýge qaraǵanda arzan ekendigin jiti túsinedi. Qosymshany jasap shyǵarý ıdeıasy júrek aqaýlarymen qosa, onkologııa túıtkilderin zertteý úshin ártúrli elderdiń klınıkalarynda bolǵan kezimde keldi. Mundaı qosymshalar shetelde suranysqa ıe. Naýqastar úshin sıfrly mobıldik baǵdarlamalardyń kóptegen servısteri bar. Bul dárigerge de, naýqasqa da óte yńǵaıly ári tıimdi», - dep atap ótti Dmıtrıı Tıo.
Ideıany is júzine asyrýǵa NEP (New Economic Platform) kompanııasy kómektesken. Ol dárigerdi medısınadaǵy avtorlyq ázirleýshilerdiń komandasyna shaqyrǵan. Resýrsty jasap shyǵarý aǵymdaǵy jyldyń mamyr aıynda bastaldy.
Dmıtrıı Tıoniń aıtýynsha, SQO ákimi jobaǵa qyzyǵýshylyq bildirip, oǵan qoldaý kórsetken. «Onkoskrın» qosymshasy maýsym aıynda «Hakaton-2017» baıqaýyna qatystyrylyp, ekinshi oryndy ıelendi. Jobany ázirleýshiler Túrkııada taǵlymdamadan ótýge grant aldy.
Qosymsha Play Market-ke qyrkúıek aıynda engiziledi. Bul joba ázirge soltústikqazaqstandyqtar úshin ǵana qoljetimdi. Keıin ony ózge óńirdiń turǵyndary paıdalana alatyn bolady.