Japonııa EKSPO kórmesine myqtap daıyndalypty. Pavılondy tanystyratyn 40 jasty konkýrs arqyly tańdap alǵan. Olarǵa qazaq tilin bilý mindettelgen. Stendshi ul-qyzdar tym bolmasa, sálemdesý, qoshtasý, alǵys bildirýdi qazaqsha aıtýy tıis bolǵan.
Japon pavılonynda qazaq tiline sýdaı eki japon qyzy bar. Sonyń biri – Mızýkı Kozasa. Ol Tokıo shet tilderi ýnıversıtetin bitirgen. Qazir osynda magıstratýrada oqıdy. Qyzyǵy sol, Mızýkı osy oqý ordasynyń «qazaq halqynyń etnografııasy» fakýltetinde bilim alypty.
«Meni ıslam dini, shamanızm erekshe qyzyqtyrady. Osy jóninde aqparattardy ınternetten qarap otyryp, qazaqtar týraly málimetterge keziktim. Qazaq tilin úırenýge degen qushtarlyǵym osydan bastaldy. Til úırený úshin sonaý Japonııadan Almatyǵa arnaıy kelip, ál-Farabı atyndaǵy Qazaq ulttyq ýnıversıtetiniń daıyndyq tobynda bir jyl oqydym. Tildi de osy kezde úırendim. Qazir qazaq dostarym da kóp», deıdi Mızýkı.
Ol qazaq pen japon dástúrinde uqsastyqtar kóp ekenin aıtady. Ásirese, úlkendi qurmetteý, kishige izet kórsetý, barǵa – qanaǵat, joqqa sabyr etý sekildi adamgershilik paıymdardy japondar da jaqsy sińirgen. Mızýkıdiń aıtýynsha, japon tilinde «mottaınaı» jáne «arıgotaı» degen sózder bar. Japondyqtardyń túsiniginshe, bul kez kelgen nárseni shúkirshilikpen qabyldap, qolda bardy uqsatyp, joqqa tarylmaý degen sóz. Bul qaǵıdat Japonııanyń energııany tutynýyna da qatysty aıtylady. Sebebi, bul eldiń tabıǵı resýrstary az. Sondyqtan, Japonııa balamaly energııa salasyna aıryqsha mán berip, bul saladaǵy tehnologııany tıimdi damytyp keledi.
Qymbat TOQTAMURAT,
«Egemen Qazaqstan»
sýretterdi túsirgen
Orynbaı Balmurat,
«Egemen Qazaqstan»