Jyl saıyn Astana meshitteri janashyr azamattardyń qoldaýymen 800-ge jýyq oqýshyny mektepke daıyndaıdy. Qala meshitterindegi «Mektepke jol» aksııasy bıyl «Nur Astana» ortalyq meshitinen bastaý aldy. Dástúrli sharaǵa QMDB naıb múftıi, Astana qalasynyń bas ımamy Naýryzbaı qajy Taǵanuly, Astana qalasy Din isteri basqarmasynyń basshysy Danııar Esın jáne "Nur Astana" ortalyq meshitiniń qurmetti aqsaqaly Aýdanbaı qajy Ahmetjanov qatysyp, jınalǵandardy kele jatqan bilim kúnimen quttyqtady.
Áleýmettik jaǵdaıy tómen jáne kópbalaly otbasylardyń balalaryna baǵyttalǵan osy ıgi is aıasynda 1-11 synyp oqýshylaryna demeý kórsetildi.
– Islam dini bilim-ǵylymǵa asa úlken mán bergen. Sebebi, Qurannyń alǵashqy aıaty «ıqra», ıaǵnı, «oqy!» dep túsken. Paıǵambarymyz Muhammed (s.ǵ.s.) bir hadısinde «Kim de kim bilim izdený jolyna shyqsa, Alla taǵala ol adamnyń jumaqqa baratyn jolyn jeńildetip, perishteler onyń tabanynyń astyna qanattaryn tóseıdi» degen eken. Iаǵnı oqýshylardyń joldary óte mańyzdy ári saýapty. Osyny eskerip, biz de «Mektepke jol» atty qaıyrymdylyq aksııasyn uıymdastyryp jatyrmyz. Sebebi qasıetti Qurannyń «Máıdá» súresiniń 2-shi aıatynda «...jaqsylyqqa, taqýalyqqa járdemdesińder» dep, adamzatty izgi isterdi qoldaýǵa buıyrady. О́z kezeginde elbasymyz Nursultan Nazarbaev ta bıylǵy Qazaqstan halqyna arnaǵan Joldaýynda «Kómekke muqtaj azamattarymyzǵa kóbirek kóńil bólý kerek. Olar úshin Qazaqstan kedergisiz aımaqqa aınalýǵa tıis» dep, árbir aýqatty qazaqstandyqtyń áleýmettik salaǵa kóńil bólýin úndegen edi, - dedi QMDB naıb múftıi, «Nur Astana» ortalyq meshitiniń bas ımamy Naýryzbaı qajy Taǵanuly. Sondaı-aq, ol saýapty isterden qalys qalmaı, «Nur Astana» ortalyq meshitiniń osy bir ıgi bastamasyna qolushyn berip, qoldaý kórsetken azamattarǵa rızashylyǵyn bildirdi.
– Men kópbalaly anamyn. Bes balam bar, onyń 3-eýi mektepke barsa, tórtinshisi birinshi synypqa endi qadam basyp jatyr. Eki jyl qatarynan meshittegi «Mektepke jol» aksııasynyń sharapatyn sezinip kelemiz. Balalardy oqýǵa daıyndaý ońaı emes. Árqaısysyna qyrýar aqsha ketetinin kez kelgeni biledi. Meshittegi qaıyrymdylyqtyń arqasynda osy qıyndyqty jeńil eńserip kelemiz. Meshit ujymyna alǵys bildiremin. Balalarym sabaqty jaqsy oqıdy dep senemin, - dedi osy is-sharada mektepke baratyn 4 balasyna kómek alǵan Baıan Jamanǵarınova.
Al, qyzy 3-shi synypqa kóshken jalǵyzbasty ana Araılym Omarova:
- Qyzym máz. Onyń qýanyshyn kórip men de rızamyn. Áli mektepke daıyndalǵan joq edik. О́tkende osy aksııa týraly estip ótinish jazyp ketkenbiz. Endi búgin qajetti qural-jabdyqtarǵa qol jetkizip jatyrmyz. Jalpy, meshitterde qaıyrymdylyqtyń úzbeı berilýi maǵan kóp kómegin tıgizdi. Máselen, qala meshitterinen dári-dármekke qajet aqshalaı kómek te, azyq-túlik te, arasynda et te berilip turady. Osyndaı sharalarǵa atsalysqan árbir janashyr azamatqa Alla taǵala razy bolsyn! – degen alǵysyn jetkizdi.
«Nur Astana» ortalyq meshitinen bastaý alǵan ıgi shara qaladaǵy basqa da meshitterde óz jalǵasyn taýyp, aldaǵy ýaqytta qala boıynsha jalpy sany 600-ge jýyq balany qamtamasyz etý josparlanýda.