Apple kompanııasynyń kórsetiliminen birneshe apta buryn Samsung iPhone-nyń básekelesi Galaxy Note8 telefonyn tanystyrdy, dep habarlaıdy «Lenta.rý».
Koreıalyq kompanııa jańa ınnovasııalyq sheshimder usynýdyń ornyna 2016 jyly shyqqan Galaxy S8 smartfonynyń sál ózgeshe úlgisin usynyp otyr. Qalyptasqan dástúr boıynsha Samsung relızdi Nıý-Iork qalasynda ótkizdi.
Kórsetilim basynda Samsung statıstıkalyq málimetter usynyp, koreıalyq kompanııanyń jaǵdaıy amerıkalyq básekelesinen áldeqaıda jaqsy ekenin jetkizdi. Sharanyń halyqqa berer jańalyǵy bolmady dese de bolady. Sebebi telefon týraly barlyq aqparat ǵalamtorda tarap ketken edi.
Galaxy S8-diń «aǵasy» Note8 de ramasyz. Ereksheligi tek kóleminde: ekran dıagonali 6,3 dıýım, al ıilgen dıspleıdiń ara qatynasy 18,5:9. Smartfon 8 mıllımetrge uzaryp, bir mıllımetrge keńeıgen. Qurastyrýshylardyń aıtýynsha, telefon alaqanǵa óte yńǵaıly. Biraq, is júzinde Note 8 óte úlken, jáne ondaı telefondy bir qolmen qoldaný ońaı emes, deıdi «Lenta.rý» tilshisi Vlad Massıno.
Telefonnyń syrt kelbeti S8-ge uqsaıdy, al korpýsy áınek pen metalldan jasalǵan. Bir jaǵymdy tusy smartfon IP68 standarty boıynsha sý men shańnan saqtalǵan. Betki panelinde eshqandaı batyrmalar joq. Sondyqtan bolar, eki telefonnyń (S8-ben Note 8) bir birinen ózgesheligi kózge birden kórinbeıdi.
Samsung kamera janynda ornalasqan saýsaq izin skanerleıtin qurylǵyny ornynda qaldyrypty. Telefonnyń kólemi ulǵaıǵan soń, álgi batyrmaǵa jetý qıyn. Bixby dybys kómekshisin shaqyrtý batyrmasy telefonnyń sol jaǵynda «dybys» batyrmasynyń astynda ornalasqan.
Akkýmýlıatordyń kólemi 3300 mıllıamper-saǵat. Telefonmen qosa symsyz qýattaǵysh, jyldam qýattaǵysh jáne energııa únemdeý rejımi bar.
Basty jańashyldyq – qos kamera. Bul kamera ótken kóktemde S8 modelinde kútilgen edi. Eki modýldiń iPhone 7 Plus sekildi 12 megapıkseldi sapasy bar. Sonymen qatar Samsung iPhone-nyń fondy bulyńǵyrlaý fýnksııasyna deıin kóshirip alǵan. Bir ereksheligi, Note 8 sýrettiń eki nusqasyn saqtaıdy. Bireýi qarapaıym sýret bolsa, ekinshisin bulyńǵyr fonmen.
Smartfonnyń satylymy qyrkúıek aıynyń ortasynda bastalady. Quny shamamtn 350-400 myń teńgedeı. Galaxy Note 8 tórt tústi: qara, kók, kúmis jáne altyn.
Jańa telefonnyń S8-den aıyrmashylyǵy qandaı degen suraqqa jýrnalıster naqty jaýap ala almady. Note 8-diń jedel jadysy úlkenirek, qos kamerasy men stılýsy bar. Biraq syrt kózge bul úlken áser qaldyrmaıdy.
Bundaı úlken telefondardyń qajettiligin áli eshkim túsindirip bere almady. Olar fýtýrıstik kınodadaǵydaı kóringenimen, qolda ustaýǵa yńǵaısyz. Sol sebepti qazirgi ýaqytta ramasyz telefondardyń ishinde úzdigi dep dıagonali 5,8 dıýım Samsung S8 aıtýǵa bolady.
Amerıkanyń The Verge saıty Nıý-Iorkte ótken jańa telefonnyń kórsetiliminen beıne rolık jarııalady:
Aıgúl ShERNIIаZ,
«Egemen Qazaqstan»