Qazaqstan Respýblıkasynyń Úkimeti Qoja Ahmet Iаsaýı murasyn ilgeriletý jáne nasıhattaý jónindegi 2026-2028 jyldarǵa arnalǵan is-qımyl josparyn bekitti. Tıisti qaýlyǵa Premer-mınıstr Oljas Bektenov qol qoıdy, dep habarlaıdy Egemen.kz Mádenıet jáne aqparat mınıstrligine silteme jasap.
Qujatta uly oıshyldyń murasyn zerdeleý, saqtaý jáne nasıhattaý, sondaı-aq Túrkistandy rýhanı týrızmniń negizgi ortalyqtarynyń biri retinde damytýǵa baǵyttalǵan 37 is-shara qarastyrylǵan.
Josparda ınstıtýsıonaldyq jáne quqyqtyq bazany jetildirý, ǵylymı-zertteý jáne bilim berý isi, mádenı-aǵartýshylyq jáne shyǵarmashylyq jobalar, aqparattyq-ımıdjdik jáne halyqaralyq is-sharalar, sondaı-aq qalpyna keltirý sııaqty bes baǵyt qamtylǵan.
Jastarmen jáne mektep oqýshylarymen jumys isteýge erekshe kóńil bólinýde. Is-sharalardyń basym bóligi Túrkistan qalasynda ótedi. Atap aıtqanda, qalada oqýshylar arasynda dástúrli «Iаsaýıtaný» baıqaýynyń respýblıkalyq kezeńin ótkizý, al mýzeı janynan «Iаsaýıtaný» klýbyn ashý josparlanyp otyr.
Jumystyń basym bóligi Qoja Ahmet Iаsaýı shyǵarmalary men ǵylymı eńbekterin basyp shyǵarý, uly oıshyldyń murasyn otandyq jáne sheteldik ǵylymı ortalyqtar men muraǵattarda anyqtaý, muraǵat materıaldary men qujattary katalogin ázirleýge qatysty.
Iаsaýı kesenesindegi aqyly qyzmetter baǵasy ózgeredi
Iаsaýı murasyn ári qaraı nasıhattaý úshin týrısterge arnalǵan aqparatty, sonyń ishinde gaıdbýktardy, beınerolıkter men aýdıo gıdterdi jańartý, sheteldik týrısterge beıimdelgen jańa týrıstik marshrýttar ázirleý, kesenede ǵylymı-restavrasııalaý jáne basqa da jumystar júrgizý josparlanyp otyr.
Josparda IýNESKO-nyń «Álem jady» baǵdarlamasy aıasynda Iаsaýıdiń tabylǵan jáne zerttelgen jazba murasyn nasıhattaý, IýNESKO men ISESKO sheńberinde Iаsaýı jylyn nemese arnaıy mádenı kúnderdi jarııalaý máselesin pysyqtaý kózdelgen.
Iаsaýı murasy Ýfada tanystyryldy
Jospardyń júzege asýy Qoja Ahmet Iаsaýı murasyn saqtaý jáne zerdeleý jumystaryn keńeıtýge, onyń el ishinde jáne shetelde nasıhattalýyn kúsheıtýge, sondaı-aq Túrkistannyń mańyzdy rýhanı, mádenı jáne týrıstik ortalyq retindegi áleýetin ashýǵa múmkindik beredi.