Qytaı Taıvan aralynyń shyǵysyndaǵy akvatorııada arnaıy teńiz operasııasyn bastady. Bul týraly Qytaıdyń «Sınhýa» aqparat agenttigi habarlady, dep jazady Egemen.kz
Operasııaǵa Fýszıan teńiz bıýrosy, Gýandýn teńiz bıýrosy, Shyǵys Qytaı teńiziniń keme qatynasy qaýipsizdigi ortalyǵy jáne Shyǵys Qytaı teńiziniń qutqarý bıýrosy qatysýda.
Qytaı tarapynyń málimetinshe, operasııanyń negizgi maqsaty eldiń ıýrısdıksııasyn nyǵaıtý, teńizdegi keme qozǵalysyn baqylaý jáne olardyń qaýipsizdigin qamtamasyz etý.
Resmı Beıjiń bul qadamdy Japonııa men Fılıppınniń Taıvannyń shyǵysyndaǵy teńiz shekarasy boıynsha kelissózder júrgizý týraly málimdemesine jaýap retinde jasap otyrǵanyn málimdedi.
Al Taıvannyń jaǵalaý kúzeti ákimshiligi Qytaıdyń áreketin halyqaralyq quqyq normalaryn buzý dep baǵalady. Taıvan tarapy jaǵdaıǵa jaýap retinde alty kemeni aımaqqa jibergen.
Taıvandyń CNA agenttiginiń habarlaýynsha, Qytaıdyń tórt kemesi Sıamen portynan shyqqanymen, Taıvannyń aýmaqtyq sýlaryna kirmegen.