Ońtústik Qazaqstan oblysynyń ákimi Janseıit Túımebaev oblystyq máslıhattyń kezekti XIV sessııasynda bıylǵy jyldyń jeti aıynda atqarylǵan jumystar boıynsha esep berdi.
2017 jyldyń jeti aıynyń qorytyndysymen oblysta mańyzdy áleýmettik-ekonomıkalyq kórsetkishterdiń ósimi saqtalǵan. Máselen, osy ýaqyt ishinde oblysta 439,1 mlrd. teńgeniń ónerkásip ónimi óndirilip, ótken jyldyń sáıkes kezeńimen salystyrǵanda 0,3 paıyzǵa ósken. Al, ónerkásip salasyndaǵy óńdeý ónerkásibi 301,3 mlrd. teńgeni qurap, 34,6 mlrd. teńgege artqan.
Osy jyly negizgi kapıtalǵa 229,9 mlrd. teńge ınvestısııa tartylǵan. О́ńirge kóptep ınvestısııa tartý maqsatynda jyl basynan beri shetel ınvestorlarymen 40-tan asa iskerlik kezdesýler uıymdastyryldy. Nátıjesinde, BAÁ – medısınalyq buıymdar jáne dárilik zattar shyǵaratyn zaýyt salý, Reseı elimen – Eýro-5 standartyna saı janar-jaǵarmaı óndiretin munaı óńdeý zaýytyn salý, al Qytaı elimen birlese bıoetalon, fosfor tyńaıtqyshyn shyǵaratyn jáne 200 MVt kún elektr stansııasy qurylystaryn júrgizý maqsatynda kelisimderge keldi.
Respýblıka boıynsha shaǵyn jáne orta kásipkerlik sýbektileriniń sany jaǵynan kósh bastaıtyn Ońtústikte búginde jumys istep turǵan ShOK sýbektileri 177 709 birlikke jetti. Al, bul salada jumyspen qamtylǵandar 331 490 adamdy qurady. Olarmen 158,3 mlrd. teńgeniń ónimi óndirilgen.
Sonymen qatar, Ońtústikte osy jyly 52 myńǵa jýyq jeke fermerlik qojalyqtardan biriktirilgen 297 kooperatıv qurylyp, 539-ǵa jetti. О́tken jylǵa qaraǵanda 2 ese artqan kooperasııa qurý jumystary boıynsha Ońtústik Qazaqstan oblysy respýblıkada kósh bastap otyr.
Baqtııar TAIJAN, «Egemen Qazaqstan»