Búgin Almaty oblysynyń Balqash aýdanynda apatqa ushyraǵan shaǵyn ushaq 100 metr bıiktikten qulaǵan. Áýe kemesindegi ushqysh Anatolıı Fedorovıch Menchıkov oqıǵa ornynda kóz jumdy, dep habarlaıdy QazAqparat.
Marqum bolǵan azamat 1954 jyly 20 jeltoqsanda týǵan. Almaty qalasynyń turǵyny. Al ushaqtyń ishindegi jolaýshy 1982 jylǵy Orynǵalı Ábdiqaıyruly Zikirbaev. Ol Balqash aýdanyndaǵy Qaraoı aýylynyń turǵyny. Onyń aıaǵy jaraqattanǵan. 35 jastaǵy azamat tikushaqpen Almaty qalasyndaǵy №7 aýrýhanaǵa jetkizilgen. Qazir naýqas sol jerde em qabyldap jatyr.
Quzyrly organnyń málimetinshe, ushaq Almaty qalasy mańyndaǵy Buryndaı eldi mekeninen ushyp shyqqan. Apat Balqash aýdanyndaǵy Jıdeli aýyldyq okrýgine qarasty «Aqshaǵyl» sharýa qojalyǵy mańynda bolǵan.
Boljam boıynsha, ushaqtyń qozǵaltqyshy isten shyqty. 100 metr bıiktikten qulaǵan eki kisilik áýe kemesi órtenbegen, tek bólshekteri synǵan.