Teriskeılik balaqaılar úshin ekzotıkalyq janýarlar men qustar tańsyq. Kóbi sýretter men kınolardan tamashalaǵany bolmasa aralarynda betpe-bet «júzdeskenderi» sırek. Igor Holodora degen jeke kásip ıesi alty jyldan beri kóziniń maıyn taýysyp, óziniń súıikti hobbıine aınaldyrǵan kóshpeli zoobaqty petropavldyq kórermenderdiń nazaryna usyndy. «Kınderland» balalar oıyn-saýyq ortalyǵyna kelýshiler ózderin ekzotıkalyq mekende júrgendeı sezinedi.
Munda Amerıka, Brazılııa, Aýstralııa, taǵy basqa ystyq jaqtarda ómir súretin tropıkalyq qustar men ańdardyń kóptegen túrleri shoǵyrlanǵan. Olardyń arasynda totyqustyń nesheme túrleri kezdesedi. Eń kishkentaıy – shýaqty aratınga. Salmaǵy 100-120 gramm ǵana, uzyndyǵy 20 santımetrden aspaıdy. Eń kárisi – jasyl qanatty ara. Jasy 15-te. Sóılegende sózdiń túbin túsiredi. Sary, qyzyl aıdarly kakadý, qyzyl lorı, mysyr kúlegi ...qustar tizbegi osylaı jalǵasa beredi.
Bes jastaǵy Bonıa esimdi aq qoldy gıbbon maımyly janynan urshyqsha úıirilip shyqpaıtyndar qarasy qalyń. Eki myń metr bıiktikke deıin erkin órmeleı alady desedi. Ábden qyzyqqa keneltti. Ábjil qımylyna kóz ilespeıtini sonshalyq, balalardyń kóbine telpegin «urlaýǵa» qumar. Sosyn «saýdalasady-aı» kelip. Banan usynsań, lezde qaıtaryp beredi. Soǵan qaraǵanda basqalarǵa salmaq salmaı óz tamaǵyn ózi taýyp júrgen tárizdi. Zoobaq qyzmetkeri Alına Eremınanyń aıtýynsha, onyń oılaý qabyleti úsh jastaǵy sábıdiki sııaqty. Týkannyń da negizgi qoregi – tek jemis. Skýns, janat tordyń ishinde typyrshyp, jandaryn qoıarǵa jer tappaı júrse, uıqy kelgende eshtenege qaramaıtyn kınkajýdyń eshkimmen sharýasy joq sekildi. Meksıka ormandaryn mekendeıtin bul gúl aıýy túnde ǵana jortyp, kúndiz aǵash qýysyna kirip alyp, uıqyny soǵatyn kórinedi. Qyzyqty kanıkýl kúnderi úlken shattyqqa kenelgen balalardyń zoobaq ıesi Igorǵa aıtar alǵystary sheksiz.
О́mir ESQALI, «Egemen Qazaqstan»
Soltústik Qazaqstan oblysy