Kóptegen halyqaralyq baıqaýlarda top jaryp júrgen «Anaǵa aparar jol» fılmi bul joly Horvatııada ótken kınofestıvalde de júldege ıe boldy.
Áıgili saıahatshy Marko Polonyń týǵan ólkesi Horvatııanyń ońtústigindegi Korchýla aralynda jyl saıyn «Marko Polo» halyqaralyq kınofestıvali ótip keledi. Bıyl festıvalge Ázirbaıjan, Bolgarııa, Úndistan, Indonezııa, Iran, Qazaqstan, Koreıa, Túrkııa, Horvatııa jáne basqa da elderden kelgen fılmder qatysty. Qazaqstandyq delegasııa quramynda «Anaǵa aparar jol» fılminde basty rólderdi somdaǵan akterler Ádil Ahmetov, Altynaı Nógerbek, kartınanyń prodıýseri Jarashan Kúlpıenov, sondaı-aq, Horvatııadaǵy QR elshiliginiń qyzmetkerleri boldy. Kóptegen halyqaralyq baıqaýlarda top jaryp júrgen «Anaǵa aparar jol» fılmi bul joly Horvatııada ótken kınofestıvalde de júldege ıe boldy. Kartınanyń rejısseri – Aqan Sataev.
Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ jáne «Novyı mır» JShS-simen birlese túsirilgen «Anaǵa aparar jol» fılmi qazaq halqynyń HH ǵasyrdaǵy kúrdeli tarıhı kezeńderden qurylǵan. Kúshtep júrgizilgen ujymdastyrý naýqany, ulttyń basyna túsken uly tragedııa – jut (asharshylyq), II dúnıejúzilik soǵys pen soǵystan keıingi beınetti jyldar kórinis tapqan. Surapyl soǵystyń mehnatyn kórgen, jat elde tutqynda bolǵan Ilııas esimdi jigittiń taǵdyry baıandalatyn fılmde týǵan jerge degen saǵynysh sýretteledi.
Saltanatty sharada sóz alǵan festıval dırektory Igor Prızmıch fılmniń kásibı daıarlyǵyn joǵary baǵalady.
«Sizder túsirgen fılm ózgeshe atmosferasynan bólek, túsirilim toby men talantty akterlardan jasaqtalǵan. Anasy men ulynyń arasyndaǵy mahabbat arqyly qazaq eliniń tarıhymen tanystyq. Fılmniń bas prodıýseri Álııa Nazarbaevanyń osyndaı eńbegi úshin alǵys bildiremiz», dedi festıval dırektory, tanymal rejısser jáne prodıýser Igor Prızmıch.
Kınotýyndy jýyrda Bishkekte ótken «Aq ilbiris» atty VI ulttyq kınojúldesinde Ortalyq Azııanyń úzdik fılmi atanǵan bolatyn. Bıyl maýsym aıynda Nıý-Iorkte ótken V eýrazııalyq kınofestıvalde tarıhı kınotýyndy «Úzdik kórkem fılm» júldesine ıe boldy.
«Bizdiń osynaý tarıhy tereń aralymyzda sizdermen jolyǵyp otyrǵanyma qýanyshtymyn. Qazaqstan týraly kóp nársemen tanystyq» degen qala meri Andrııa Fabrıs qazaqstandyq týrısterdi qushaq jaıa qarsy alýǵa daıyn ekenin málimdedi.
Aıa О́mirtaı,
"Egemen Qazaqstan"