Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda «Jańa gýmanıtarlyq bilim. Qazaq tilindegi 100 jańa oqýlyq» jobasy boıynsha atqarylyp jatqan aýdarma jumysyn talqylaýǵa arnalǵan «Qazirgi ǵylymı aýdarma: teorııasy men praktıkasy» taqyrybynda dóńgelek ústel ótti.
Sharaǵa joǵary oqý oryndarynyń oqytýshy-ǵalymdary, aýdarmashylar, redaktorlar, baspagerler, tilshi jáne ádebıetshi mamandar men jaýapty mekemelerdiń ókilderi qatysty. Basqosýda joba aıasyndaǵy ǵylymı termınder men uǵymdardy qazaq tiline aýdarý, ózge tilderden engen sózder qoldanysy, termınologııa, stıl, aýdarmashylar ortasynyń kásibı deńgeıin kóterý máselesi sóz boldy.
Jıynda psıhologııa, áleýmettaný, mádenıettaný, ekonomıka, til, din salalary boıynsha jeltoqsan aıynda jaryqqa shyǵýy tıis on jeti kitap talqylandy. Kitaptar tikeleı túpnusqadan aýdarylyp jatqandyqtan, jaryqqa shyqqansha tórt deńgeıden ótedi. Aýdarmashylar men ádebı redaktorlar, tilshiler tyǵyz jumys istep jatyr. Aýdarmashylar – ǵylymı dárejesi bar, shet tilin meńgergen sala mamandary. «Ulttyq aýdarma bıýrosy» qoǵamdyq qorynyń basshysy Raýan Kenjehanuly: «Jalpy sany 800-ge tarta oqýlyq usynyldy. Sonyń ishinen orys tiline aýdarylmaǵan úzdik on jeti kitap iriktelinip alyndy. Bul kitaptar – álemdegi jetekshi oqý oryndarynyń baspalarynan shyqqan oqýlyqtar. Osy kitaptardy aýdarý úshin toqsan adamnan qurylǵan jumys toby irikteldi. Ár oqýlyqqa jaýapty óz adamdary bar. Bul jumys birneshe kezeńnen turady. Oqýlyqtar stýdentterge arnalǵannan keıin, onyń aýdarmasynyń jatyq, qazaqsha tolyq túsinikti bolýyn qatań qadaǵalap otyrmyz», dedi.
Talqylaý barysynda tilshi-ǵalymdar Sherýbaı Qurmanbaıuly men Anar Fazyljanova Ahmet Baıtursynov atyndaǵy Til bilimi ınstıtýtynyń shyǵarǵan termınologııalyq sózdikteri men túsindirme sózdikterin keńinen paıdalaný men aýdarmadaǵy qate uǵymdardy jipke tizgendeı aıqyndap berdi. Ásirese, fılosofııa oqýlyqtarynyń tiline kóp syn aıtylǵanymen, osy joly mamandar aýdarma sapasynyń joǵary bolatynyn aıtty.
Baǵashar TURSYNBAIULY, «Egemen Qazaqstan»
ALMATY