Bıyl júlde qory 45 000 eýro bolatyn «Kazakhstan open-2017» týrnırine álemniń 26 elinen 132 golfshy qatyspaq, dep habarlaıdy QazAqparat.
Uıymdastyrýshy «Kazakhstan open» uıymynyń baspasóz ortalyǵy bıylǵy týrnırdiń júlde qory - 450 000 eýro, bul - European Challenge Tour týrnırleri arasyndaǵy eń qomaqty júlde qory bolyp sanalatynyn aıtty.
13-shi halyqaralyq Kazakhstan Open golf-týrnıri 20-24 qyrkúıek aralyǵynda, Almaty qalasyndaǵy «NURTAU» Golf klýbynda «European Challenge Tour» aıasynda, kásipqoı oıynshylar arasynda ótedi.
Týrnırge álemniń 26 elinen kelgen 132 golfshy qatysady, olardyń ishinde Eýropalyq Chellendj týrdyń reıtıngi boıynsha alǵashqy júzdikke kiretin kásipqoı golfshylar jáne qazaqstandyq 5 golfshy bar.
«Kazakhstan Open»-2017 týrnıriniń uıymdastyrýshylary - European Challenge Tour, Qazaqstan golf federasııasy, Almaty ákimdiginiń qoldaýymen NURTAU Golf Klýby.
«Kazakhstan open-2017» oıyndary European Tour-dyń barlyq talaptaryna saı keletin NURTAU golf klýbynyń 18 chempıondyq alańdarynda ótedi.
«Kazakhstan Open» týrnıriniń jeńimpazy eýropalyq golftyń elıtasy bolyp sanalatyn European Tour-ǵa qatysa alady.
«Týrnırdiń biregeıligi onyń qomaqty júlde qorynda ǵana emes, sonymen qatar golf maýsymynyń aıaqtalý kezeńinde ótip jatqanymen de erekshe. European Challenge Tour oıynshylarynyń reıtıngi sportshylardyń osy serııa týrnırinde jeńip alǵan júldeler sanynan quralatyndyǵy belgili. Maýsym qorytyndysy boıynsha reıtıngtiń alǵashqy jıyrmalyǵyna kirgen, ıaǵnı eń úlken júlde utyp alǵan sportshylar eýropalyq golftyń eń joǵarǵy lıgasy - European Tour-ǵa joldama alady. Osylaısha, sportshylardyń «Kazakhstan open» týrnırinde sátti oınaýy European Challenge Tour reıtıngisinde joǵary kóterilýine jáne eýropalyq golf elıtasyna kirýge múmkindik beredi», - delingen atalǵan ortalyqtyń habarlamasynda.
Qazaqstannyń atynan týrnırge 1-3 qyrkúıek aralyǵynda ótetin áýesqoılar arasyndaǵy jarystyń chempıony men vıse-chempıony qatysady. Sonymen qatar, Qazaqstan ókilderi sporttyq sheberlikterin jetildirý úshin jattyqtyrýshylar qatarynan qazaqstandyq úsh kásipqoı golfshyny týrnırge qatystyrady.
Aıta keteıik, «Kazakhstan open» golf-týrnırin ótkizýge QR prezıdenti N.Nazarbaev elimizdi álemdik qoǵamdastyqqa tanytý jáne ınvestısııalyq tartymdylyǵyn arttyrý baǵdarlamasy aıasynda bastamashylyq etken.
«Kazakhstan open» uıymdastyrylǵaly European Challenge Tour týrnıri serııalarynyń aldyńǵy qatardaǵylarynyń birine aınaldy. Ár jyldary munda Maıkl Kaımer, Alvaro Kıros, Edýardo Malınarı, Tommı Flıtvýd sııaqty golf sportynyń álemdik juldyzdary oınady.
Qazaqstan golf federasııasynyń habarlaýynsha, federasııa prezıdenti Nurtaı Ábiqaev jańa olımpıadalyq kezeńniń birinshi jylynda ótetin týrnırge úlken úmit artatynyn jetkizgen.