EKSPO-2017 halyqaralyq kórmesi qalashyǵyndaǵy Qatar memleketiniń pavılonynda bıznes-forým ótti. Basqosýǵa «Kahramaa» kompanııasynyń, elektrmen jáne sýmen jabdyqtaý máselelerimen aınalysatyn korporasııalardyń, sondaı-aq 14 myń stýdent bilim alatyn Qatar ýnıversıteti ókilderi qatysty. Shara barysynda tabıǵı resýrstardy saqtaý salasyndaǵy jumystar kórsetilip, memlekettiń jańǵyrmaly energııa kózderiniń qoldanystaǵy jáne josparlanyp otyrǵan jobalary tanystyryldy.
Jıynda «Kahramaa» kásipornynyń ókilderi eldegi energııany únemdeý jáne sý resýrstaryn saqtaý salasyndaǵy jumys nátıjelerin usyndy. Máselen, 2015 jyldan bastap onda sý tutynýdy 35 paıyzǵa, al elektrdi 20 paıyzǵa qysqartqan. Memlekettiń tabıǵı resýrstardy saqtaý týraly jańa zańyna sáıkes, «Kahramaa» birqatar tehnologııalardy ázirleýde, olardyń arasynda ǵımarattardy energııamen qamtamasyz etýge arnalǵan kún sáýlesi qýatyn paıdalaný, sýmen jylytý jobalary bar. Sondaı-aq, sý jylytqysh, tońazytqysh, muzdatqysh jáne kirjýǵysh mashınalary úshin elektr energııasy ónimdiliginiń eń tómengi standartyn engizilýde.
Forýmda Qatar ýnıversıteti biregeı stadıonnyń josparyn tanystyrdy. Onda 2022 jyly FIFA fýtbol oıyndarynan álem chempıonatyn ótkizý josparlanýda. Osy sharaǵa oraı boı kóteretin nysanǵa salqyndatýdyń ınnovasııalyq júıesi engizilmek. Onda arnaıy tehnologııa salqyn jeldi stımýlıasııalaý jáne aýa sergitkishterdi qoldanyp, sportshylar men kórermender úshin qolaıly temperatýrany saqtap turýǵa múmkindik beredi. Qatar ýnıversıtetiniń professory, doktor Saýd Ghanı álem chempıonaty ótetin nysandardyń qurylysshylary qandaı jaǵdaıda jumys istep jatqanyn da áńgimeledi. «Oqý orny ǵalymdary 35-40 gradýstyq ystyqta 15 gradýstyq temperatýrany ustap turatyn salqyndatý tehnologııasyn oılap tapty. Bul oıynǵa el qazynasynan joǵary deńgeıde qarjy bólinýde. Álemdik dodada oınaıtyn Qazaqstan quramasyna da sáttilik tileımin», dedi doktor.
Jıyn barysynda qazaqstandyq bıznesmender qatarlyq «jasyl» tehnologııa jobalaryna qyzyǵýshylyq tanytyp, iskerlik baılanys ornatýǵa ýaǵdalasty.
Qazaqstan men Qatar mańyzdy ekonomıkalyq áriptester bolyp tabylady. Byltyr eki el arasyndaǵy taýar aınalymy 746,5 myń AQSh dollaryn qurady. Onyń ishinde eksport 647,6 myń dollar bolsa, ımport – 98,9 myń dollar.
Ashat RAIQUL, «Egemen Qazaqstan»